შინაგან საქმეთა სამინისტრო აცხადებს, რომ ჭონქაძის ქუჩაზე მომხდარი მკვლელობა გახსნილია. უწყების ცნობით, სამართალდამცავებმა 1983 წელს დაბადებული პირი განზრახ მკვლელობის ბრალდებით, თბილისში დააკავეს.

გამოძიების ვერსიით, ბრალდებულმა მიმდინარე წლის 16 აგვისტოს თბილისში, ჭონქაძის ქუჩაზე, ნაცნობს - 1973 წელს დაბადებულ ი.ძ.-ს ცეცხლსასროლი იარაღიდან გასროლით სხეულზე მრავლობითი ჭრილობა მიაყენა და შემთხვევის ადგილიდან მიიმალა. დაჭრილი საავადმყოფოში მიყვანისთანავე გარდაიცვალა.

გამოძიება განზრახ მკვლელობის და ცეცხლსასროლი იარაღის მართლსაწინააღმდეგო შეძენა-შენახვა-ტარების ფაქტზე მიმდინარეობს.