საქართველოს პრემიერმინისტრმა, ირაკლი კობახიძემ, ამერიკულ კომპანია Concentrix-ში ჩხრეკის შესახებ შეკითხვაზე პასუხად საზოგადოებას გამოძიების ინფორმაციის გავრცელების დალოდებისკენ მოუწოდა და თქვა რომ "ეს ინფორმაცია საზოგადოებისთვის შეიძლება ძალიან საინტერესო იყოს ".

"დაელოდეთ გამოძიების ინფორმაციას და ეს ინფორმაცია საზოგადოებისთვის შეიძლება იყოს ძალიან საინტერესო. შეიძლება, ძალიან საინტერესო იყოს ეს ინფორმაცია. მე ვმარჩიელობ ახლა, მაგრამ მგონია, რომ შეიძლება იყოს საინტერესო", — თქვა კობახიძემ.

დღეს, 24 ოქტომბრის დილიდან, თბილისის რამდენიმე ადგილას ჩხრეკა ჩატარდა. ფინანსთა სამინისტროს საგამოძიებო სამსახურმა Concentrix-ის ერთ-ერთი თანამშრომლის, სანდრო ცხადაძის სახლიც გაჩხრიკა.

ამასთან, atlantic Council-ის ორი თანამშრომლის, ეთო ბუზიაშვილისა და სოფო გელავას სახლებშიც ჩაატარეს ჩხრეკა. ისინი, ამერიკული კვლევის ცენტრის, ატლანტიკური საბჭოს ორგანიზაცია "ციფრული ექსპერტიზის კვლევითი ლაბორატორიის" მკვლევრები არიან.

ფინანსურმა პოლიციამ ის ფართიც გაჩხრიკა, რომელსაც სთენდაფერი ონისე ცხადაძე და მისი ძმა ქირაობდნენ — ამის თაობაზე ინფორმაცია თვითონ ონისემ Facebook-ზე გაავრცელა. ონისეც Concentrix-ის თანამშრომელია.

დღევანდელ ჩხრეკაში ვალერი ტყეშელაშვილის სახლიც მოჰყვა, რომელიც Mercatus Capital-ის დამფუძნებელია და საქართველოში დროებით არის ჩამოსული.

ფინანსთა სამინისტროს საგამოძიებო სამსახურის განმარტებით, ჩხრეკა უკავშირდება ე.წ. ქოლცენტრებსა და დავით ხაზარაძეს. უწყების განცხადებით, „ საგამოძიებო ღონისძიებები წარიმართა „სამ სავარაუდო ე. წ. ქოლცენტრში”, თუმცა განცხადებაში ობიექტები ჩამოთვლილი არ არის.