სამოქალაქო იდეა ქართული ოცნების შემომწირველების რუსულ კავშირებზე საუბრობს. ორგანიზაციის მიერ გავრცელებული ანგარიშში ნათქვამია, რომ მმართველი ძალის მთავარი დამფინანსებლები, ხშირ შემთხვევაში, რუსულ ბაზარზე არიან დამოკიდებული და სარგებელს სახელმწიფო ბიუჯეტიდან იღებენ. ანგარიშის მიხედვით, მმართველი პარტია, მისი ბიზნეს ინტერესებითა და რუსული კავშირებით, ქვეყნის უსაფრთხოებისთვის სერიოზულ გამოწვევას და საფრთხეს წარმოადგენს.

"ქართული ოცნების პრაქტიკულად ყველა დიდ შემომწირველს ორი რამ აკავშირებს ერთმანეთთან: სრული დამოკიდებულება რუსეთსა და რუსულ ბაზარზე; პრაქტიკულად ყველას აქვს ორმაგი – რუსული და ქართული მოქალაქეობა ან ჰყავს რუსეთის მოქალაქე დამფუძნებელი, თანამეწილე, ან დირექტორი და პირდაპირი კავშირი ბიძინა ივანიშვილის ოჯახთან", — ნათქვამია ანგარიშში.

სამოქალაქო იდეა წერს, რომ ყველაზე დიდი სარგებელი რუსული ბაზრის გახსნით და ბიუჯეტის აგროკრედიტის პროგრამით ქართული ოცნების ერთ-ერთმა მთავარმა შემომწირველმა ალექსანდრე ივანიშვილმა, ბიძინა ივანიშვილის ძმამ მიიღო. ალექსანდრე ივანიშვილის ბიზნეს პარტნიორები დეპუტატი ზაალ დუგლაძე და მისი ძმები არიან. ორგანიზაციის მტკიცებით, ალექსანდრე ივანიშვილი და მისი რუსეთის მოქალაქე პარტნიორები სწორედ ის ადამიანები არიან, რომლებიც პრემიერის მიერ სხვადასხვა ანგარიშებში ჩამოთვლილი საბიუჯეტო პროგრამების მთავარ მოსარგებლეებად გვევლინებიან.

"ალექსანდრე ივანიშვილი დუგლაძეების ღვინის კომპანიის და კოტეხი-გურჯაანის ღვინის ქარხნის მეწილეა, მისი შემოწირულება ქართული ოცნებისთვის 335 768 ლარს შეადგენს. ბიძინა ივანიშვილის ძმასთან დაკავშირებულმა მეღვინეობის კომპანიებმა ოცნების მმართველობის პერიოდში სახელმწიფო აგროკრედიტის პროგრამიდან 10 მილიონამდე დაფინანსება მიიღო", — ნათქვამია ანგარიშში.

კვლევაში მოყვანილი მონაცემებით, ექსპორტი რუსეთში გაიზარდა, ხოლო სხვა ქვეყნებში ჯამურად შემცირდა.

"2024 წელს, ქართული ღვინის პოპულარიზაციის სახელმწიფო პროგრამის დაფინანსება კვლავ გაიზარდა, 16 მილიონ ლარამდე, თუმცა ამის მიუხედავად არავითარი პროგრესი მსოფლიოს პრიორიტეტულად გამოცხადებულ ბაზრებზე არ გვქონია, მაშინ როცა, ღვინის ექსპორტში რუსეთის წილი გაიზარდა და 2024 წლის პირველი რვა თვის მონაცემებზე დაყრდნობით 73.5%-ს მიაღწია,"— ნათქვამია ანგარიშში.

სამოქალაქო იდეა აღნიშნავს, რომ კვლევისას ნათლად გამოჩნდა სხვა ღვინის მწარმოებელი დონორებიც, რომლებიც ასევე მჭიდრო კავშირს ინარჩუნებენ რუსეთთან: ავთანდილ კოჩაძე, დიმიტრი კოსტაროვი, ნოშრევან (ნოშიკო) ნამორაძე, ვაჟა ციგროშვილი და სხვები.