ბლოგერ უჩა აბაშიძისა და მისი მეუღლის, მარიამ იაშვილის საქმის პროკურორის, ანი ხახანაშვილის განცხადებით, პროცესზე დღეს დაკითხულმა მოწმემ სასამართლოს ბრალდების დამადასტურებელი ინფორმაცია მიაწოდა. მისი თქმით, აღნიშნული ინფორმაცია მოწმეს გამოძიების ეტაპზეც ჰქონდა მიწოდებული, რაც სასამართლოშიც დაადასტურა.

დაკავებულებიდან მხოლოდ მარიამ იაშვილი აღიარებს ბრალს, უჩა აბაშიძე დუმილის უფლებით სარგებლობს.

შეგახსენებთ, რომ უჩა აბაშიძესა და მარიამ იაშვილს ბრალი საქართველოს სისხლის სამართლის კოდექსის 157-ე პრიმა და 236-ე მუხლებით წარუდგინეს, რაც პირადი ცხოვრების საიდუმლოს უკანონოდ მოპოვება-შენახვას და ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვას გულისხმობს.

სახელმწიფო ბრალდების ცნობით, დაკავებულებმა უკანონოდ მოიპოვეს ასეულობით პირის პირადი ცხოვრების საიდუმლოს შემცველი ინფორმაცია. გამოძიების ინფორმაციით, ჩანაწერებში საზოგადოებისათვის ცნობილი პირებიც ფიგურირებენ, რომელთა გადაღებაც უკანონოდ ხორციელდებოდა.