ქართული ოცნების მერობის კანდიდატი, კახა კალაძე, თბილისის მოსახლეობას, არჩევის შემთხვევაში, ქალაქში ეკოლოგიური მდგომარეობის გაუმჯობესებას ჰპირდება.

"ყველამ უნდა ვისუნთქოთ სუფთა ჰაერი და ვიცხოვროთ ჯანსაღ გარემოში, არაფერი ღირს ჩვენი და ჩვენი შვილების ჯანმრთელობის ფასად. თბილისს ყველაზე მეტად რაც აბინძურებს, მე მგონია, რომ ეს არის ტრანსპორტი და მშენებლობები. ასევე მნიშვნელოვანია პარკებისა და რეკრეაციული ზონების არსებობა, მოსაგვარებელია ნარჩენების მართვის საკითხიც" - ამბობს მერობის კანდიდატი.

კალაძე საზოგადოებრივი ტრანსპორტის განახლებაზეც საუბრობს და ამბობს, რომ ყველაფერს გააკეთებს, რომ მათი აწყობა საქართველოში მოხდეს.

კალაძის თქმით, მერად არჩევის შემთხვევაში, ის საბაგირო ხაზების განვითარებას და ელექტრომობილების პოპულარიზაციას გეგმავს.

მერობის კანდიდატი სამშენებლო რეგულაციების გამკაცრების პირობას დებს, ასევე ამბობს, რომ მტკვრის მიდამოებში არსებულ ზონებზე დასასვენებელ პარკებს მოაწყობს და თბილისში ნარჩენების შეგროვება-გადამუშავების სისტემას დანერგავს.