ევოლუშენ ჯორჯიას გაფიცულმა თანამშრომელმა მახარე პატაშურმა, რომელიც 26 დღე შიმშილობდა, ჯანმრთელობის მდგომარეობის გაუარესების გამო შიმშილობა შეწყვიტა.

"კლინიკაში გადამიყვანეს, სამჯერ გადამისხეს გლუკოზა და შაქრის დონე არა და არ ჩადგა ნორმაში. მითხრეს, რომ თუ შიმშილობას არ შევწყვეტდი ძალიან გამიუარესდებოდა მდგომარეობა. ჩემს მაგივრად სხვა თანამშრომელმა დაიწყო შიმშილობა და ეს პროცესი გრძელდება," — აღნიშნავს მახარე ნეტგაზეთთან

პროფკავშირი ლაბორის ცნობით, მახარე პატაშური ორი დღის განმავლობაში მშრალ შიმშილობაზე იყო გადასული.

შეგახსენებთ, ევოლუშენ ჯორჯიას თანამშრომელთა ნაწილი 12 ივლისს შრომის ღირსეული პირობების შექმნის და ხელფასის მოთხოვნით გაიფიცა. 13 აგვისტოს მათგან რამდენიმემ შიმშილობა დაიწყო. 21 აგვისტოს კი ერთ-ერთმა გაფიცულმა პირი ამოიკერა.

ამ ხნის განმავლობაში გაფიცულებსა და დამსაქმებელს შორის უშუალო კომუნიკაცია არ შემდგარა. 22 აგვისტოს, გაფიცვიდან 42-ე დღეს, გაფიცულებს სახალხო დამცველიც შეხვდა. ლევან იოსელიანის განცხადებით, სახალხო დამცველის აპარატი საკითხს სწავლობს და გადაწყვეტილებას მალე მიიღებენ.