4 სექტემბერს თბილისში, გლდანში, ადმინისტრაციული წესით დააკავეს ნაციონალური მოძრაობის წევრი ირაკლი ნადირაძე.

როგორც მოგვიანებით გაირკვა, ის 5 სექტემბერს გვიან ღამით ხელწერილის საფუძველზე გაათავისუფლეს.

ნადირაძის დაკავებამდე რამდენიმე საათით ადრე, პოლიცია მობილიზებული იყო ნაციონალური მოძრაობის საკრებულოს წევრის, ირაკლი ეძგვერაძის სახლთანაც. შსს-ს განმარტებით, ეძგვერაძე პოლიციელებისთვის სამსახურებრივი მოვალეობის შესრულებაში ხელშეშლისთვის დააკავეს.

"შინაგან საქმეთა სამინისტროს ცენტრალური კრიმინალური პოლიციის თანამშრომლები ასრულებდნენ სამსახურებრივ მოვალეობას, კერძოდ საგამოძიებო მოქმედებას ნარკოდანაშაულთან დაკავშირებით, რა დროსაც მათ სამსახურებრივი მოვალეობის შესრულებაში ხელი შეუშალა მოქალაქე ირაკლი ეძგვერაძემ, რომელსაც არანაირი შეხება არ ქონდა საგამოძიებო მოქმედებასთან", — ამბობენ შსს-ში

5 სექტემბერს დილით, ირაკლი ეძგვერაძის ადვოკატმა ჟურნალისტებთან განცხადება გააკეთა და თქვა, რომ მის დაცვის ქვეშ მყოფს ეტყობა სისხლნაჟღენთები, ჩალურჯებები, მათ შორის — კისრის მიდამოში.

"მასზე იძალადეს სამოქალაქო ტანსაცმლიანმა, შეიარაღებულმა პირებმა და მოვუწოდებ სპეციალურ საგამოძიებო სამსახურს, უმოკლეს დროში გამოიძიონ სისხლის სამართლის დანაშაული, რომელიც პოლიციელებმა ჩაიდინეს," — თქვა ჟურნალისტებთან საუბრისას ირაკლი ეძგვერაძის ადვოკატმა ლაშა ტყეშელაძემ

ხელწერილით გათავისუფლებული ირაკლი ნადირაძე ჰყვება, რომ ის ყველანაირი ახსნა-განმარტების გარეშე დააკავეს.

"ჯერ მეუბნებოდნენ, რომ დაკავებული არ ვიყავი, ელოდებოდნენ მითითებებს, მერე კი გადამიყვანეს კონკრეტულ შენობაში და ხელწერილით გამოგვიშვეს, ალბათ იქნება ჩვენი სასამართლო პროცესი და ჩაგვსვამენ ალბათ ორი კვირით ან დაგვაჯარიმებენ, როგორც ეს ქართულ ოცნებას სჩვევია", — ამბობს ნადირაძე

ერთიანი ნაციონალური მოძრაობა პარტიის წევრების დაკავების ფაქტს მალევე გამოეხმაურა. პარტიის განცხადებით, აღნიშნული დაკავებები ირაკლი კობახიძის მიერ დაანონსებული რეპრესიების გამოძახილია.

"ერთიანობა ნაციონალური მოძრაობა მოითხოვს ორივე დაკავებულის დაუყოვნებლივ გათავისუფლებას! ხელისუფლებაში მოსვლის დღიდან, ქართული ოცნება ძალადობს საზოგადოებაზე, ხლეჩს მას, უპირისპირდება ადამიანებს და ამით იზოლაციასა და ჩიხში შეჰყავს მთელი ქვეყანა. ესაა „ქართული ოცნების“ განწირული მცდელობა, ძალადობით შეინარჩუნოს ძალაუფლება და ქვეყანა დატოვოს იზოლაციასა და სიღატაკეში. 26 ოქტომბერს გაიმარჯვებს ქართველი ხალხი და დაასრულებს ამ უკანონობასა და ძალადობას!" - წერია ენმ-ის განცხადებაში.