რეჟისორი კვენტინ ტარანტინო ამერიკელი კომიკოსის, ბილ მეიჰერის საავტორო პოდკასტის Club Random უახლესი ეპიზოდის სტუმარი იყო. ტარანტინომ და მეიჰერმა პოდკასტის მსვლელობისას ერთად მარიხუანა მოწიეს და კინოს ინდუსტრიაზე, ოსკარების ცერემონიის უწამყვანობაზე ისაუბრეს. საუბრისას ალეკ ბოლდუინის სასამართლო საქმის საკითხიც წამოიჭრა — ბოლდუინმა ფილმის Rust გადასაღებ მოედანზე შემთხვევით დატენილი იარაღი გაისროლა, რამაც კინემატოგრაფი ჰალინა ჰაჩენსის სიკვდილი გამოიწვია.

"ვფიქრობ, რომ ეს შემთხვევა 90%-ით იმ ადამიანის ბრალია, ვინც იარაღებზე იყო პასუხისმგებელი, თუმცა მკვლელობაში ბოლდუინსაც მიუძღვის 10%-იანი წილი. როცა საქმე იარაღს ეხება, რაღაც დონეზე მსახიობიც ინაწილებს პასუხისმგებლობას." — განახადა ტარანტინომ მეიჰერთან საუბრისას.

რეჟისორის თქმით, როცა გადასაღებ მოედანზე იარაღის გამოყენებაა საჭირო, სპეციალისტები მისი გამოყენების წესებს მსახიობებს დაწვრილებით უხსნიან. "თუ მსახიობმა იცის, რომ მის იარაღში სამი ტყვია დევს და სცენაში სამჯერ გასროლა უწევს, პირველივე ხარვეზის დროს უნდა მიმართოს დამხმარე პერსონალს" — აღნიშნა ორი ოსკარის მფლობელმა რეჟისორმა ბოლდუინის საქმის განხილვისას.

"არ შეიძლება, რომ მსახიობებმა ცარიელი იარაღები გამოიყენონ და გასროლის ეფექტი შემდეგ დაედოს სცენას? — იკითხა მეიჰერმა, რაზეც ტარანტინოსგან პასუხად მიიღო, რომ "ეს უსისხლო იქნება. პორნოშიც შესაძლებელია ციფრული ერექციის შექმნა, მაგრამ ასეთი პორნოს ყურება ვის რა ჯანდაბად უნდა?" მისი თქმით, ნამდვილი, ფიზიკური დეტალები ხდიან ფილმებს განუმეორებლებად — "სწორედ ნამდვილი ნარინჯისფერი ცეცხლის ნახვაა აღმაფრთოვანებელი და არა შემდგომში დამატებული სპეცეფექტის."