დღეს, 11 ივლისს, დაარსდა ახალი სამოქალაქო მოძრაობა — აირჩიე ევროპა, რომელიც სხვადასხვა პროფესიის ადამიანებს აერთიანებს.

სამოქალაქო მოძრაობის დამფუძნებლები არიან ხათუნა ლაგაზიძე, ლელა ჯეჯელავა, გიორგი რუხაძე, ლაშა ძებისაშვილი და ივა ჭყონია. მათი თქმით, მოძრაობის მიზანი საქართველოს დამოუკიდებლობის, თავისუფლების და ევროპული მომავლის დაცვაა.

"ჩვენ გთავაზობთ, საზოგადოების ფართო მონაწილეობით, შევქმნათ სტრატეგიული დიალოგის პლატფორმა, საქართველოს განვითარების გრძელვადიანი გეგმის შესამუშავებლად. ეს სტრატეგია უნდა გახდეს საბაზისო დოკუმენტი მომდევნო მთავრობებისთვის. როცა არჩევანი ასე მარტივია: რუსეთი თუ ჩვენი შვილები? — რა თქმა უნდა, ჩვენ ვირჩევთ შვილებს. ჩვენი შვილების ერთადერთი არჩევანი კი ევროპაა", — განაცხადა ხათუნა ლაგაზიძემ.

მოძრაობის დამფუძნებლების თქმით, მათი მოძრაობის კარგი ღიაა ყველასთვის, განურჩევლად პოლიტიკური გემოვნებისა: "ვირჩევთ ევროპას, რაც ნიშნავს დემოკრატიული და პროდასავლური ძალების გამარჯვებას საქართველოში".

მოძრაობის დაფუძნებას ესწრებოდა საქართველოს პრეზიდენტი სალომე ზურაბიშვილიც.

ფოტო: პრეზიდენტის ადმინისტრაცია

"მე მგონი, უკვე ავირჩიეთ ევროპა და ავირჩიეთ დიდი ხანია. საქართველო ყველა თავისი ისტორიის მთავარ მონაკვეთზე ირჩევს და ირჩევს განვითარების გზა, ამიტომ ესოდენ გვიადვილდება ევროპისკენ ვიაროთ. ვიაროთ ვთქვი, მაგრამ ეს გზა გაიყინა. გაგვიყინა ეს გზა ამ ხელისუფლებამ, რომელმაც ამით გადაუხვია ქვეყნის კონსტიტუციას, ამით უარი უთხრა საკუთარ ამომრჩეველს", — განაცხადა პრეზიდენტმა, ღონისძიებაზე სიტყვით გამოსვლისას.

მისივე თქმით, ეს არ არის საარჩევნო კამპანია, არამედ დღეს არის რეფერენდუმი, რომელშიც ერთ მხარეს დგას საქართველოს საზოგადოება და მეორე მხარეს — ხელისუფლება.