ახალი პოლიტიკური ცენტრი – გირჩის ლიდერმა ზურაბ ჯაფარიძემ პარტიის ოფიციალური ფეისბუკ გვერდით მიმართვა გაავრცელა. ამ მიმართვაში ის ამბობს, რომ 31 ივლისს იწურება ცენტრალურ საარჩევნო კომისიაში იმ 27 ათასი ხელმოწერის შეტანის ვადა, რაც აუცილებელია პარტიის ადგილობრივი თვითმმართველობის არჩევნებზე დასარეგისტრირებლად.

ზურაბ ჯაფარიძის თქმით, რამდენიმე კვირის წინ დაწყებული კამპანიის შედეგად, პარტიამ მხოლოდ შვიდი ათასი რეალური ხელმოწერის შეგროვება მოახერხა, რაც საკმარისი არ არის არჩევნებზე დასარეგისტრირებლად.

"ჩვენ ვაპირებთ ღიად, საჯაროდ დავამზადოთ 27 ათასი ყალბი ხელმოწერა, ანუ გავაკეთოთ ის, რასაც სხვადასხვა პარტიები წლების განმავლობაში საქართველოში აკეთებენ ჩუმად. ჩვენ ამას გავაკეთებთ საჯაროდ, რომ თქვენთვის და ამ ქვეყნის მოქალაქეებისთვის გასაგები და თვალსაჩინო იყოს, რა მარაზმი და იდიოტობაა ეს საარჩევნო პროცესი.

ამ ხელმოწერების დამზადებას დავიწყებთ ხვალიდან, ჩვენ არ გამოვიყენებთ არცერთ იმ რეალურ ხელმოწერას, რაც შევაგროვეთ იმიტომ, რომ არ ვაკადრებთ ამ ადამიანებს, მათი ხელმოწერები გამოყენებული იყოს ამ სიცრუეში, რომელსაც ჩვენ დავდგამთ.

შეგროვილ 27 ათას ხელმოწერას, ამ ბიუროკრატიულ მაკულატურას, რომელიც კანონი გვავალდებულებს, წავიღებთ ოფიციალურად და ჩავაბარებთ ცენტრალურ საარჩევნო კომისიას", – ამბობს ზურაბ ჯაფარიძე.

გირჩი მოუწოდებს მსურველებს, თბილისში, პარტიის ცენტრალურ ოფისში, გამოცხადდნენ და სურვილისამებრ დაეხმარონ მათ ხელმოწერების გაყალბებაში. აღნიშნული პროცესი 11 საათზე დაიწყება და ორი დღის განმავლობაში, 24-საათიან რეჟიმში გაგრძელდება.

იმის მიუხედავად, ცესკო მისცემს თუ არა უფლებას გირჩს, დარეგისტრირდეს არჩევნებზე, ზურაბ ჯაფარიძე საზოგადოებას საინტერესო გაგრძელებას ჰპირდება.