პროკურატურის განცხადებით, პირს, რომელმაც ახალციხეში ყოფილი სიდედრის მიმართ ელექტროშოკი და აეროზოლი გამოიყენა, ხოლო ყოფილი ცოლი იარაღით დაჭრა, აღკვეთის ღონისძიების სახით პატიმრობა შეეფარდა.

გამოძიების ვერსიით, 2017 წლის 25 ივლისს, დაახლოებით 12 საათზე, ახალციხეში არაფხიზელ მდგომარეობაში მყოფმა ა.გ.-მ ყოფილი ცოლის დედას ლ.რ.-ს, მისივე საცხოვრებელი სახლის ეზოში ზურგის არეში ელექტროშოკი მიადო, აეროზოლი შეასხურა და ხელის კვრით წააქცია, რის შედეგადაც მიაყენა სხეულის დაზიანება. შემდეგ კი ყოფილ ცოლს ო.რ.-ს ტრავმატული პისტოლეტის თავის არეში დარტყმით და რამდენიმე გასროლით, სხეულის სხვადასხვა ადგილზე მიაყენა მრავლობითი დაზიანებები. უწყების ინფორმაციით, ბრალდებული დანაშაულის ჩადენის ადგილიდან მიიმალა.

ბრალდებული სამართალდამცველებმა ფაქტის ჩადენიდან რამდენიმე საათში დაკავეს. მას ბრალი საქართველოს სისხლის სამართლის კოდექსის 126 პრიმა მუხლის პირველი ნაწილით (ოჯახის ერთი წევრის მიერ მეორეს მიმართ ძალადობა, რამაც ფიზიკური ტკივილი გამოიწვია) და 11 პრიმა 118-ე მუხლის პირველი ნაწილით (ოჯახის წევრის მიმართ ჯანმრთელობის განზრახ ნაკლებად მძიმე დაზიანება) წარედგინა.