NDI-ს კვლევის მიხედვით, ინტერნეტს პოლიტიკისა და მიმდინარე მოვლენების შესახებ ინფორმაციის მიმღებთა რიცხვი კვლავ გაიზარდა. ბოლო კვლევით, რომლის პრეზენტაციაც დღეს, 26 ივლისს გაიმართა, ინტერნეტს მნიშვნელოვან წყაროდ გამოკითხულთა 41 პროცენტი მიიჩნევს.

გამოკითხულთა 19 პროცენტი მას პირველ მნიშვნელოვან წყაროდ მიიჩნევს, მეორე მნიშვნელოვან წყაროდ კი - 23 პროცენტი. 2014 წელს ინტერნეტს ორჯერ ნაკლები ადამიანი მიიჩნევდა მნიშვნელოვან წყაროდ. 2014 წლის აგვისტოს მონაცემებით, პირველ მნიშვნელოვან წყაროდ ინტერნეტს 8 პროცენტი ასახელებდა, მეორე წყაროდ კი - 13.

ფოტო: NDI

NDI-ს ბოლო კვლევამ აჩვენა, რომ ტელევიზია კვლავ ლიდერია (73%) მოსახლეობისთვის ინფორმაციის მიღების პირველწყაროდ დასახელებისას. ტელევიზია მეორე მნიშვნელოვან წყაროდ 15 პროცენტმა დაასახელა.

ამავე კვლევის მიხედვით, მოსახლეობის 3 პროცენტი მეგობრებსა და მეზობლებს პირველ მნიშვნელოვან წყაროდ ასახელებს, მეორე მნიშვნელოვან წყაროდ კი - 16.

ფოტო: NDI

კვლევა დიდი ბრიტანეთის მთავრობის, UK aid-ის ფინანსური ხელშეწყობით ჩატარდა, გამოკითხვას კი CRRC-საქართველო ატარებდა. კვლევის საველე სამუშაოები 18 ივნისი - 9 ივლისის პერიოდში, საქართველოს მასშტაბით (ოკუპირებული ტერიტორიების გამოკლებით) შესრულდა. 2 261 პირი, პირისპირ ინტერვიუს სახით, წარმომადგენლობითი შერჩევით გამოიკითხა, ცდომილება კი 2,2 პროცენტია.