მოკლედ: სამხატვრო აკადემიის, თეატრალური უნივერსიტეტის და კონსერვატორიის სტუდენტების მიერ ორგანიზებული მარში "თავისუფალი ხელოვნებისთვის", კულტურისა და სპორტის სამინისტროს შენობასთან მსვლელობით დასრულდა.

დეტალები: სტუდენტების მარში რუსთაველის მეტროსთან 10:00 საათზე დაიწყო. ისინი მსვლელობით მივიდნენ სამხატვრო აკადემიის, თეატრალური უნივერსიტეტის და კონსერვატორიის შენობასთანაც.

  • "ეს სამი უნივერსიტეტი ყველაზე მეტად არის დაკავშირებული თეა წულუკიანთან და კულტურის სამინისტროსთან, სწორედ ამიტომ, გვინდა ვუთხრათ მას, რომ არასწორია რუსული ცენზურა, რუსული რეჟიმი, ჩვენ გვინდა რომ ვიყოთ თავისუფალი ხელოვანები", — უთხრა თეატრალური უნივერსიტეტის სტუდენტმა ტელეკომპანია პირველს.
  • ახალგაზრდებმა კულტურის სამინისტროსთან ევროკავშირის ჰიმნი შეასრულეს.

ბოლო ხაზი: დღეს, 21 მაისს, 15:00 საათზე, საქართველოს პარლამენტთან, რუსული კანონის წინააღმდეგ, ახალგაზრდების მიერ ორგანიზებული კიდევ ერთი აქცია გაიმართება.