თბილისი მერობის კანდიდატი და საკრებულოს დეპუტატი, ალეკო ელისაშვილი ამბობს, რომ დედაქალაქის ბიუჯეტიდან ხეების დასარგავად სამი მილიონი ლარი კორუფციული გარიგებით გაიხარჯა. მერობის კანდიდატი ამბობს, რომ 2016 წელს ხეების დასარგავად გამოცხადებულ ტენდერში ექვსი დღის შექმნილმა კომპანიამ გაიმარჯვა.

ელისაშვილის ინფორმაციითვე გამწვანება 2016-მა ოთხი ტენდერი მოიგო სანაცვლოდ კი სამ მილიონამდე ლარი მიიღო.

"კორუფციული გარიგებით კომპანიამ მერიას გამწვანებისთვის განკუთვნილი ნერგების 100 პროცენტი ისე ჩააბარა, რომ ისინი არანაირ სტანდარტს არ აკმაყოფილებდა. საგულისხმოა ის ფაქტიც, რომ კომპანია დარგვის დროს უკვე გამხმარი ნერგების მოვლა პატრონობისთვისაც იღებდა საბიუჯეტო თანხებს", - ამბობს ელისაშვილი.

მისივე ინფორმაციით, კომპანიას, რომელსაც ხეები უნდა დაერგო თბილისის ზღვის მიმდებარედ ერთ ჰექტრამდე ტერიტორია საკუთარი მეურნეობისთვის უკანონოდ აქვს დაკავებული, სადაც ნერგებსაც ყიდის. საკრებულოს დეპუტატი ამბობს, რომ ქალაქი ამ ქმედების შედეგად საიჯარო ქირას კარგავს რაც, სავარაუდოდ, 100 ათას ლარს აღემატება.

"ამ ფაქტს უკვე თვეებია იძიებს პროკურატურა, გამოკითხულია ათობით ადამიანი, მათ შორის მერიის გამწვანებისა და ეკოლოგიის სამსახურის მაღალჩინოსნები. თუმცა საბიუჯეტო სახსრების გაფლანგვისთვის ამ დრომდე არავის პასუხისმგებლობის საკითხი არ დამდგარა", - დასძენს ელისაშვილი.

თბილისის მერის არჩევნებზე დავით ნარმანიას საარჩევნო პროგრამის ერთი ნაწილი თბილისში მილიონი ხის დარგვას უკავშირდებოდა. ალეკო ელისაშვილი სწორედ ამ პროექტის ფარგლებში დასარგავად გამოცხადებულ ტენდერში გამარჯვებულ კომპანიაზე საუბრობს.

On.ge ამ საკითხზე ცდილობს თბილისის მერიის პასუხის მოპოვებას, რომელსაც მიღებისთანავე შემოგთავაზებთ.