მოკლედ: პროევროპული ოპოზიციური პოლიტიკური პარტიები ერთიან განცხადებას ავრცელებენ და წერენ, რომ ქართული არასამთავრობო ორგანიზაციების მიერ, 28 აპრილს დაანონსებულ ევროპულ მარშს უერთდებიან.

პარტიები აღნიშნავენ, რომ აფასებენ სამოქალაქო სექტორის პოზიციას, რომლის მიხედვით, ისინი რუსული კანონის ჩაგდებამდე, ხელისუფლებასთან თანამშრომლობას აჩერებენ და უარს ამბობენ დარეგისტრირდნენ "ღირსების შემლახავ რეესტრში".

• ერთობლივ განცხადებას ხელს აწერენ პარტიები: ახალი, გირჩი — მეტი თავისუფლება, დროა, ერთიანი ნაციონალური მოძრაობა, ლელო საქართველოსთვის, რესპუბლიკური პარტია და სტრატეგია აღმაშენებელი.

პარტიების განცხადება: "29 აპრილს ქართული ოცნების მიერ დაგეგმილი შეკრება, რომელზეც საჯარო სამსახურებში დასაქმებულ ადამიანებს საკუთარი ნების საწინააღმდეგოდ თბილისში ჩამოიყვანენ, არის ამ ადამიანების შეურაცხყოფა, რუსული ხელისუფლების მიერ მათი გამოყენება ჩვენი საერთო ევროპული მომავლის წინააღმდეგ და ცხადი პროვოკაცია იმ გულწრფელი და მშვიდობიანი დემონსტრანტების მიმართ, რომელთა უწყვეტმა პროტესტმა უკვე ათი დღეა მოიცვა დედაქალაქის ქუჩები.

• მივმართავთ საჯარო სამსახურებში დასაქმებულ ადამიანებს. ჩვენ კარგად გვესმის პოლიტიკური წნეხის მასშტაბი, რომელსაც ქართული ოცნება თქვენს წინააღმდეგ იყენებს.
• თუმცა, ეს ის მომენტია, როდესაც თითოეულმა თქვენგანმა უნდა გააკეთოს ერთადერთი სწორი არჩევანი — არ დაემორჩილოთ რუსული ხელისუფლების მითითებას და ნუ გახდებით ივანიშვილის ფარი ჩვენი ქვეყნის ევროპული მომავლის წინააღმდეგ ბრძოლაში.
• 29 აპრილს ივანიშვილის მიერ ორგანიზებული შეკრების მიზანია დაყოს და დააპირისპიროს ქართველი ხალხი, შექმნას ყალბი სურათი, თითქოს რუსულ კანონთან დაკავშირებით საქართველოში არსებობს განსხვავებული პოზიციის მქონე ორი ბანაკი.
• ჩვენ კარგად გვესმის საზოგადოების მთლიანობის მნიშვნელობა და არასოდეს დავუშვებთ კრემლის საოცნებო სცენარს ჩვენი ხალხის დაყოფისა და დაპირისპირების შესახებ.
• ერთიანი ძალებით, კოორდინირებულად ვემზადებით წინააღმდეგობისთვის რუსული კანონის მეორე მოსმენით განხილვის დღისათვის, როცა ყველამ ერთად, მტკიცედ უნდა განვაცხადოთ კი ევროპას! არა რუსულ კანონს! არა რუსულ მთავრობას!".

კონტექსტი: გუშინ, 25 აპრილს, არასამთავრობო და მედიაორგანიზაციებმა განაცხადეს, რომ რუსული კანონის ჩაგდებამდე, ხელისუფლებასთან თანამშრომლობას აჩერებენ.

• ისინი უარს ამბობენ ხელისუფლების წარმომადგენლებთან ერთად შეხვედრებში მონაწილეობაზე, სამუშაო ჯგუფებსა და მრჩეველთა საბჭოებში მუშაობაზე და საერთაშორისო თუ სხვა სამუშაო ფორმატებში ხელისუფლებასთან კოორდინაციაზე.
• გარდა ამისა, ორგანიზაციები აცხადებენ, რომ არავითარი ფორმით არ დარეგისტრირდებიან "ღირსების შემლახავ რეესტრში"