მოკლედ: ევროკავშირის პოლიტიკის და უსაფრთხოების კომიტეტი (PSC), რომელიც 10-11 აპრილს საქართველოში სამუშაო ვიზიტით იმყოფება, შეშფოთებას გამოთქვამს საქართველოს მთავრობის ბოლოდროინდელ ინიციატივებზე, მათ შორის, რუსულ კანონზე.

კომიტეტი აღნიშნავს, რომ დროა, შესრულდეს ევროკომისიის ცხრა ნაბიჯი და "თავიდან იყოს აცილებული ნებისმიერი გადაწყვეტილება, რომელიც ევროკავშირისკენ მიმავალ გზაზე დაბრკოლებას შექმნის".

  • მათ დაიმოწმეს ევროკავშირის უმაღლესი წარმომადგენლის პრეს-სპიკერის 2024 წლის 4 აპრილის განცხადება.

ვის შეხვდა დელეგაცია: დელეგაცია კომიტეტის თავმჯდომარის, ელჩის დელფინ პრონკის ხელმძღვანელობით, შეხვდა პრეზიდენტს — სალომე ზურაბიშვილს, პრემიერ-მინისტრს — ირაკლი კობახიძეს, საგარეო საქმეთა მინისტრს — ილია დარჩიაშვილს, თავდაცვის მინისტრს — ირაკლი ჩიქოვანს, საპარლამენტო უმრავლესობის, ოპოზიციის და სამოქალაქო საზოგადოების წარმომადგენლებს.

რაზე ისაუბრეს შეხვედრის დროს: კომიტეტის წევრებმა ხაზი გაუსვეს ევროკავშირში ინტეგრაციის გზაზე, საქართველოს მიერ არსებული მომენტის გამოყენების მნიშვნელობას და აღნიშნეს, რომ საქართველოსთვის კანდიდატის სტატუსის მინიჭების, 2023 წლის 14 დეკემბრის შემდეგ, ევროკავშირის კარი წევრობისთვის ღიაა.

  • მათი თქმით, ევროკავშირში გაწევრიანება არის დამსახურებაზე დაფუძნებული პროცესი და საქართველოს ხელისუფლებას, ამ მიზნის მისაღწევად, აუცილებელი ნაბიჯების გადადგმისკენ მოუწოდეს.
  • კომიტეტის მიხედვით, ევროკომისიის 2023 წლის 8 ნოემბრის რეკომენდაციები ცხრა ნაბიჯის სახით მკაფიო სახელმძღვანელოს წარმოადგენს.
  • "საჭირო რეფორმები და წინსვლა შეფერხების გარეშე, მთელი საზოგადოების მონაწილეობის მიდგომით, მთავრობის, ყველა პოლიტიკური პარტიისა და სამოქალაქო საზოგადოების ჩართულობით უნდა განხორციელდეს", — განაცხადა კომიტეტმა.

ასევე, ევროკავშირი მიესალმება საქართველოს მთავრობის გადაწყვეტილებას მოიწვიოს ეუთო/ოდირის დამკვირვებლები.

  • ევროკავშირი აღნიშნავს თავისუფალი და სამართლიანი არჩევნების აუცილებლობას და ხაზს უსვამს საარჩევნო კოდექსში შეტანილ ცვლილებებთან დაკავშირებით, ეუთო/ოდირის და ვენეციის კომისიის მიერ გაწეული ყველა დარჩენილი რეკომენდაციის გათვალისწინების საჭიროებას.

ბოლო ხაზი: დელეგაციის ჩამოსვლა არის ნაწილი რეგიონში უფრო დიდი ვიზიტისა, რომელიც მოიცავს შეხვედრებს სომხეთში (8-9 აპრილი), ასევე აზერბაიჯანში (11-12 აპრილი) და მიზნად ისახავს პარტნიორებთან დიალოგის გაძლიერებას ევროკავშირისთვის მნიშვნელოვან რეგიონში.

  • დელეგაციის წევრები საქართველოში ევროკავშირის სამოქალაქო სადამკვირვებლო მისიას (EUMM Georgia) ეწვევიან და ადმინისტრაციულ სასაზღვრო ხაზს მოინახულებენ.
  • კომიტეტი საქართველოს პირველად 7 წლის წინ ეწვია.