მოკლედ: სააგენტო როიტერსი სამ წყაროზე დაყრდნობით, ექსკლუზიურად იუწყება, რომ ირანმა რუსეთი რამდენიმე დღით ადრე გააფრთხილა ფართომასშტაბიანი ტერორისტული თავდასხმის შესაძლებლობის შესახებ, ვიდრე 22 მარტს, მოსკოვის მახლობლად, კროკუს სითი ჰოლის საკონცერტო დარბაზზე თავდასხმა მოხდებოდა, რაც, რუსეთის უახლეს ისტორიაში ერთ-ერთი ყველაზე დიდი ტერორისტული აქტია.

• "თავდასხმამდე რამდენიმე დღით ადრე, თეირანმა მოსკოვს გადასცა ინფორმაცია რუსეთში მოსალოდნელი დიდი ტერაქტის შესახებ. ინფორმაცია ირანში აფეთქებების ორგანიზებაში ეჭვმიტანილი პირების დაკითხვის შედეგად იქნა მოპოვებული", — განაცხადა სააგენტოს ერთ-ერთმა თანამოსაუბრემ.

კონტექსტი: საუბარია ბოლო დროის ყველაზე დიდ ტერორისტულ აქტზე ირანის ტერიტორიაზე, რომელიც მოხდა 2024 წლის 3 იანვარს და ასზე მეტი ადამიანი ემსხვერპლა, ათობით დაშავდა.

• ისევე როგორც კროკუს სითი ჰოლის შემთხვევაში, თავდასხმაზე პასუხისმგებლობა ირანში მომხდარ ტერაქტზეც ტერორისტულმა ორგანიზაცია "ისლამურმა სახელმწიფოს" აიღო.
• როიტერსის ერთ-ერთმა წყარომ აღნიშნა, რომ ირანის მიერ მოსკოვისთვის გადაცემული ინფორმაცია არ მოიცავდა კონკრეტულ ცნობას თავდასხმის შესაძლო სამიზნის შესახებ, თუმცა, რუსეთს გადასცეს, რომ ტერორისტული დაჯგუფების ზოგიერთი წევრი გაემგზავრა რუსეთში, სავარაუდოდ, ტერაქტის მოსაწყობად.

ამის მიუხედავად, რუსეთის ხელისუფლება არ აკეთებს განცხადებებს ისლამური სახელმწიფოს ბრალეულობის შესახებ და ცდილობს, პასუხისმგებლობა უკრაინას დააკისროს. თუმცა, როგორც გამოცემა ბლუმბერგი, კრემლთან კავშირების მქონე ოთხ წყაროზე დაყრდნობით აცხადებს, რუსეთის პრეზიდენტის, ვლადიმირ პუტინის ახლო წრეში მიიჩნევენ, რომ არ არსებობს არანაირი მტკიცებულება კროკუს სითი ჰოლის საკონცერტო დარბაზში მომხდარ ტერაქტში უკრაინის მონაწილეობის შესახებ.

გაიგე მეტი: ტერაქტზე პუტინის ვერსიის მის გარემოცვასაც არ სჯერა, უყვება ბლუმბერგს კრემლთან დაკავშირებული 4 წყარო

კრემლს მოსალოდნელ ტერაქტზე ამერიკაც აფრთხილებდა: რუსეთმა, მოსალოდნელ ტერაქტზე, ინფორმაცია მიიღო ამერიკის შეერთებული შტატებისგანაც, რაზეც, დამატებითი დეტალები რუსეთში აშშ-ის ელჩის, ლინ ტრეისისგან გახდა ცნობილი ახლახან.

ელჩის, ლინ ტრეისის განცხადებაში ხაზგასმულია გარემოება, რომ რუსეთის ოფიციალურმა პირებმა "დაამახინჯეს" აშშ-ის მიერ მიწოდებული ცნობები მოსალოდნელი ტერორისტული საფრთხის შესახებ, იმის მიუხედავად, რომ აშშ-სგან რუსეთის ხელისუფლებისთვის მიწოდებული წერილობითი ინფორმაცია იყო კონკრეტული, დროული და სანდო.

• "სამწუხაროდ, რუსეთის რამდენიმე ოფიციალურმა პირმა დაამახინჯა და საჯაროდ უარყო იმ ინფორმაციის სარგებლიანობა, რომელიც აშშ-ს მთავრობამ მიაწოდა რუსეთის უსაფრთხოების სამსახურებს ამ თვის დასაწყისში, ისლამური სახელმწიფოს საფრთხეების შესახებ", — განაცხადა ამერიკელმა დიპლომატმა.

გაიგე მეტი: დამატებითი დეტალები — აშშ-ის ელჩმა განაცხადა, როგორ აფრთხილებდნენ კრემლს მოსალოდნელ ტერაქტზე