ახლახან პიანისტ გიორგი გიგაშვილს Terrence Judd-Hallé-ს ჯილდო გადაეცა. BBC Radio ჯილდოს ყოველწლიურად ახალი თაობის 3 პიანისტს გადასცემს. გამარჯვებული ჯილდოდ ფულად პრემიასაც მიიღებს და სიმფონიურ ორკესტრ Hallé-სთან ერთად კონცერტებზეც დაუკრავს.

გიორგი გიგაშვილი Hallé-სთან ერთად კონცერტს მანჩესტერში გამართავს. გარდა ამისა, ქართველი პიანისტის სოლო კონცერტიც იგეგმება და მსმენელის წინაშე გიგაშვილი სხვა მუსიკალური საღამოების ფარგლებშიც წარდგება. კონცერტების დეტალური განრიგი 2 მაისს გახდება ცნობილი.

"მუსიკალური კარიერის დასაწყისში ასეთი მხარდაჭერისა და ჯილდოსთვის წარმოუდგენლად მადლიერი და ბედნიერი ვარ, ეს დიდ მოტივაციას მაძლევს", — განაცხადა გიორგი გიგაშვილმა.

ცოტა ხნის წინ ცნობილი გახდა, რომ გიორგი გიგაშვილი BBC-ის სიმფონიურ ორკესტრთან ერთადაც დაუკრავს. გასულ წელს გიორგი გიგაშვილი BBC-ის New Generation Artists-ის 2-წლიან პროგრამაში მოხვდა. პროგრამაში მონაწილეობა გულისხმობს დიდ ბრიტანეთში კონცერტებს, ფესტივალებსა და ალბომების ჩაწერას ისეთ პრესტიჟულ ორკესტრებთან, როგორებიც BBC Philharmonic და BBC-ის სიმფონიური ორკესტრი არიან.