რა ხდება: თბილისის სააპელაციო სასამართლოს თავმჯდომარის, მიხეილ ჩინჩალაძის ცოლმა, შვილმა და მამამ, ოჯახის წევრებისგან, 5 წლის განმავლობაში საჩუქრად, ჯამში, 120 468 აშშ დოლარი მიიღეს.

  • ამის შესახებ საერთაშორისო გამჭვირვალობა — საქართველო წერს.

დეტალები: არასამთავრობო ორგანიზაციის განცხადებით, ინფორმაცია 2019-2023 წლების დეკლარაციების მიხედვით აქვთ.

  • მიხეილ ჩინჩალაძე გავლენიანი მოსამართლეების ჯგუფის, ე.წ. კლანის ერთ-ერთ ლიდერად მიიჩნევა.
  • ის აშშ-ის მიერ სანქცირებულ მოსამართლეებს შორის არის.

სტრიქონებს შორის: 2023 წლის 5 აპრილს, აშშ-მა სანქციები დაუწესა სამ მოქმედ და ერთ ყოფილ მოსამართლეს.

სანქცირებული არიან ლევან მურუსიძე, მიხეილ ჩინჩალაძე, ირაკლი შენგელია და ვალერიან ცერცვაძე.

სახელმწიფო დეპარტამენტის განცხადებით, მოსამართლეები "მნიშვნელოვან კორუფციულ საქმიანობაში ჩართულობის გამო" დაექვემდებარნენ სანქციებს და მათ აშშ-ში შესვლა ეკრძალებათ.

"სწორედ ასეთი ფაქტების კანონიერებისა და დასაბუთებულობის გამოკვლევას ისახავს მიზნად მოსამართლეთა კეთილსინდისიერების შემოწმების მექანიზმი, რომლის ამოქმედებასაც ევროკომისია გვთხოვს და მთავრობა ეწინააღმდეგება", — ნათქვამია საერთაშორისო გამჭვირვალობა — საქართველოს განცხადებაში.

მსგავსი: "ეს თემა დახურულია ჩვენთვის" – კობახიძე ვეტინგის შესახებ

კონტექსტი: ევროკომისიამ 2023 წლის 11 ნოემბრის ანგარიშში დაწერა, რომ აუცილებელია იუსტიციის უმაღლესი საბჭოს უფრო საფუძვლიანი და ყოვლისმომცველი რეფორმა.

  • "სისტემური გამოწვევების გადასაჭრელად, როგორც ვენეციის კომისიამაც აღნიშნა 2023 წლის ოქტომბრის დასკვნაში, საჭიროა, უფრო საფუძვლიანი და სისტემური კეთილსინდისიერების შემოწმება, რეგიონში დამკვიდრებული საუკეთესო პრაქტიკის შესაბამისად, ევროკომისიასთან და ვენეციის კომისიასთან კონსულტაციებით", — წერია ანგარიშში.

სასამართლო რეფორმის საჭიროებაზე საუბარია 9 დათქმაშიც, რომელიც ევროკავშირის წევრობისთვის უნდა შევასრულოთ.

ვეტინგს ეწინააღმდეგება როგორც უზენაესი სასამართლო, ისე — ხელისუფლება და საპარლამენტო უმრავლესობის წევრები.

გაიგე მეტი: "ვეტინგი ნიშნავს მართლმსაჯულების ოკუპაციას" — რატი იონათამიშვილი