მოკლედ: ბათუმის საქალაქო სასამართლომ, ჯგუფურად ჩადენილი ყაჩაღობის, ცეცხლსასროლი იარაღებისა და საბრძოლო მასალის მართლსაწინააღმდეგო შეძენის, შენახვისა და ტარების, ასევე პოლიციელებზე თავდასხმის ფაქტებზე ბრალდებული სამი პირი დამნაშავედ ცნო.

  • ორ პირს 10-10 წლით, ხოლო ერთს 8 წლით პატიმრობა მიესაჯა.

დეტალები: პროკურატურის მტკიცებულებებით დადასტურდა, რომ ქობულეთის მუნიციპალიტეტში, ბრალდებულები საცხოვრებელ სახლში თავს დაესხნენ დაზარალებულებს. ერთ-ერთ დაზარალებულს თავის არეში დაზიანება მიაყენეს, შემდეგ კი დაეუფლნენ მათ კუთვნილ ოქროს სამკაულებს და მოითხოვეს 300 000 ლარის გადაცემა.

  • 2023 წლის 17 ივნისს, აჭარის ავტონომიური რესპუბლიკის პოლიციის დეპარტამენტის თანამშრომლებმა, აღნიშნული პირები ოპერატიული ინფორმაციის საფუძველზე შეაჩერეს, რა დროსაც ბრალდებულებმა პოლიციელებს ცეცხლსასროლი იარაღებიდან ესროლეს.
  • სროლის შედეგად, ერთ-ერთმა პოლიციელმა სიცოცხლისთვის სახიფათო მძიმე ხარისხის ჯანმრთელობის დაზიანება მიიღო.
  • სამართალდამცველებმა სამივე პირი იმავე დღეს დააკავეს.