აზერბაიჯანის ცენტრალურმა საარჩევნო კომისიამ განაცხადა, რომ წინასწარი შედეგებით, პრეზიდენტმა ილჰამ ალიევმა, რიგგარეშე საპრეზიდენტო არჩევნებში ხმების 92% მიიღო.

ამ შედეგით, ალიევი ქვეყნის პრეზიდენტი მეხუთე ვადით გახდება. ამ თანამდებობაზე მან მამამისი 2003 წელს შეცვალა. წინა არჩევებში, 2018 წელს, საარჩევნო კომისიამ განაცხადა, რომ ალიევმა ხმების 86% მიიღო. ცესკო-ს ინფორმაციით, აქტივობამ 77% შეადგინა.

გუშინ, 7 თებერვალს გამართულ კენჭისყრას თან ახლდა ინფორმაცია გაყალბების შესახებ. დამოუკიდებელი მედია და აქტივისტები აქვეყნებენ კადრებს ინტერნეტში, სადაც ჩანს, რომ მიმდინარეობა საარჩევნო ყუთებში ბიულეტენების ჩაყრა, ადგილი ჰქონდა ე.წ. კარუსელებს და სხვა დარღვევებს.

ეს კადრები ინტერნეტში გამოჩნდა მცდელობის მიუხედავად, დაებლოკათ ზოგიერთი დამკვირვებელი საარჩევნო უბნებზე. მედიასაშუალება თურანმა განაცხადა, რომ ჟურნალისტებს, რომლებიც არ იყვნენ რეგისტრირებული აზერბაიჯანის მედია რეესტრში, უბნებზე გადაღება აეკრძალათ.

საარჩევნო სპეციალისტმა მამედ მამადზადემ Meydan TV-ს განუცხადა, რომ დამკვირვებლებზე ზეწოლა ხდებოდა საარჩევნო უბნების გახსნისა და ხმის მიცემის პროცესში.

"დამკვირვებლები, რომლებსაც სურთ ფოტოების, ან ვიდეოების გადაღება, გარკვეული ფორმით იხსნებიან [საარჩევნო] უბნიდან. მათზე ახორციელებენ ზეწოლას, იძახებენ პოლიციას. ზეწოლის ეს ფორმები თითქმის ყველა საარჩევნო უბანზე გვხვდება”, — თქვა მამადზადემ.

ალიევს არჩევნებში 6 მოწინააღმდეგე ჰყავდა, რომლებიც მმართველი პარტიის მხარდამჭერები იყვნენ. ოფიციალური შედეგების მიხედვით, მათგან 2%-ზე მეტის მოპოვება ვერავინ შეძლო.

აზერბაიჯანის მთავარმა ოპოზიციურმა პარტიებმა დეკემბერში თქვეს, რომ ბოიკოტს გამოუცხადებდნენ არჩევნებს.

არჩევნები მედიაზე განხორციელებული რეპრესიების ფონზე გაიმართა. ნოემბრის ბოლოდან პოლიციამ დააკავა და ბრალი წაუყენა AbzasMedia-ს ხუთ წევრს ჯგუფურად უცხოური ვალუტის კონტრაბანდისთვის. დაკავებულთა შორის იყვნენ დირექტორი და დამფუძნებელი ულვი ჰასანლი, მთავარი რედაქტორი სევინჯ ვაგიფგიზი, დირექტორის მოადგილე მაჰამედ კეკალოვი და ჟურნალისტები ჰაფიზ ბაბალი და ნარგიზ აბსალამოვა და ელნარა გასიმოვა.

ილჰამიზ გულიევი, უფლებადამცველი და ყოფილი პოლიციელი, რომელმაც AbzasMedia-ს ანონიმურად მოუყვა, როგორ უდებდა პოლიცია ეჭვმიტანილებს ნარკოტიკს, ასევე დააკავეს დეკემბრის დასაწყისში და ბრალი დიდი რაოდენობით მეტამფეტამინის ფლობაში წაუყენეს.

ნოემბერსა და დეკემბერში დააკავეს ორი ონლაინ ტელეარხის, Kanal 13-ისა და Kanal 11-ის დამფუძნებლებიც. პირველს ბრალად ედებოდა სახლის უნებართვოდ აშენება, მეორეს კი — გამოძალვა.

ალიევმა ვადამდელი არჩევნების შესახებ დეკემბერში განაცხადა და თქვა, რომ გადაწყვეტილების მიზეზი იყო აზერბაიჯანის მიერ მთიან ყარაბაღზე აღებული სრული კონტროლი. არჩევნები 2025 წელს უნდა გამართულიყო.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.