რა ხდება: ანდერს ბრეივიკი, რომელმაც 2011 წელს 77 ადამიანი მოკლა, სახელმწიფოს ადამიანის უფლებების დარღვევისთვის უჩივის.

  • მისი თქმით, მისი განმარტოებით საკანში ყოფნა, ადამიანის უფლებათა ევროპული კონვენციის მიხედვით, არაადამიანურ მოპყრობას უტოლდება.

დეტალები: ბრეივიკი მოთავსებულია ორსართულიან კომპლექსში, სადაც არის სამზარეულო, სასადილო ოთახი, ტელევიზორის ოთახი Xbox-ით და რამდენიმე სავარძლით.

  • ბრეივიკს შეუძლია, ასევე, სარგებლობა ტრენაჟორების ოთახით.
  • მისი მოთხოვნის საფუძველზე, ციხის ადმინისტრაციამ თუთიყუშებიც მიუყვანა.

ფოტო: Ole Berg-Rusten / NTB/AFP

  • ამის მიუხედავად, მისი ადვოკატი, ოისტინ სტრორვიკი აცხადებს, რომ ბრეივიკს, რომელმაც სახელი ფიოტოლფ ჰანსენით შეიცვალა, არ აქვს საშუალება, ჰქონდეს მნიშვნელოვანი და ღრმა ურთიერთობები ადამიანებთან. ასევე, ადვოკატის მტკიცებით, მის დაცვის ქვეშ მყოფს უზღუდავენ წერილების მიღებისა და გაგზავნის საშუალებასაც, რაც, ასევე, მისი უფლებების დარღვევაა.
  • ამავე მიზეზით სარჩელი ბრეივიკმა 2016 წელსაც შეიტანა, თუმცა სასამართლომ არ დააკმაყოფილა.
  • მან 2022 წელს შეწყალებაც ითხოვა, რაზეც ასევე უარი მიიღო.

ბოლო ხაზი: 2011 წლის 22 ივლისს ანდერს ბრეივიკმა, ბომბის აფეთქების შედეგად, ოსლოში 8 ადამიანი მოკლა. შემდეგ კი გაემგზავრა კუნძულ უტოიაზე, სადაც ახალგაზრდულ ბანაკში 69 ადამიანი ცეცხლსასროლი იარაღით მოკლა.

  • მათ შორის იყო საქართველოს მოქალაქეც.
  • მომდევნო წელს ბრეივიკს 21-წლიანი პატიმრობა მიუსაჯეს, ეს არის მაქსიმალური სასჯელი, რასაც ნორვეგიის კანონმდებლობა ითვალისწინებს.
  • თუმცა, იმ შემთხვევაში, თუ ის კვლავ დარჩება საზოგადოებისთვის საშიშად, შესაძლოა, ციხეში განუსაზღვრელი დროით დატოვონ.
  • მსჯავრდადებულს ერთხელაც არ გამოუხატავს სინანული ჩადენილი დანაშაულის გამო. საკუთარ საქციელს კი ის უწოდებს ჯვაროსნული ლაშქრობას ნორვეგიაში მულტიკულტურალიზმის წინააღმდეგ.