მოკლედ: საქართველოს საპატრიარქოს საზოგადოებასთან ურთიერთობის სამსახური ფეისბუქზე წერს, რომ ტყიბულისა და თერჯოლის ეპარქიის მღვდელმსახურმა, სპირიდონ ცქიფურიშვილმა, საეკლესიო სასჯელი ევროკავშირის დროშის დაწვის გამო არ მიიღო.

• მათი განცხადებით, მღვდელმსახური დასაჯეს "სასულიერო პირების შეურაცხყოფისთვისა და ცილისმწამებლური განცხადების გამო".

სტრიქონებს შორის: "საქართველოს ეკლესიის სინოდალური კომისიის სხდომაზე, "დისციპლინური და ეთიკური დარღვევებისთვის, მოციქულათა 55,56 და კართაგენის 79-ე კანონის საფუძველზე, დეკანოზ სპირიდონ ცქიფურიშვილს შეუჩერდეს ყოველგვარი მღვდელმოქმედების უფლება",— წერია 26 დეკემბრის სონოდალური კომისიის დასკვნაში.

რატომ წვავენ მღვდლები ევროკავშირის დროშებს: ევროკავშირის მიერ საქართველოსთვის კანდიდატის სტატუსის მინიჭების შემდეგ, 16 დეკემბერს, პრორუსული, ძალადობრივი მოძრაობის, ალტ-ინფოს ერთ-ერთმა ლიდერმა, ლაშა შარუხიამ, მცხეთის გამგეობის შენობაზე აღმართული ევროკავშირის ყველაზე დიდი დროშა დაწვა.

შარუხია ადმინისტრაციულ შენობაზე თავდასხმის ბრალდებით, პროკურატურამ დააკავა და ბრალი წაუყენა სისხლის სამართლის კოდექსის 187-ე მუხლის მეორე ნაწილით, რაც გულისხმობს ნივთის დაზიანებას ცეცხლის წაკიდებით.

• სასამართლომ უარი განაცხადა შარუხიას გირაოთი გათავისუფლებაზე და მას წინასწარი პატიმრობა შეუფარდა.
• ლაშა შარუხიას ბრალდება წაყენებული აქვს ქონების დაზიანება-ცეცხლის წაკიდების მუხლით, რაც 3-დან 6-წლამდე თავისუფლების აღკვეთას ითვალისწინებს.

ლაშა შარუხიას ძალადობრივი პარტიის, კონსერვატიული მოძრაობის რამდენიმე ლიდერი და საქართველოს საპატრიარქოს მღვდელმსახურები, სოლიდარობის ნიშნად, ევროკავშირის დროშების დაწვით გამოეხმაურნენ.

მათ შორის იყვნენ, მღვდლები: ბასილ ახვლედიანი, სპირიდონ ცქიფურიშვილი და იაკობ მესტვირიშვილი.

• 22 დეკემბერს კონსერვატიული მოძრაობის ლიდერებმა, ზურაბ მახარაძემ და ირაკლი მარტინენკომ, თბილისის მერიის წინ ევროკავშირის დროშა ჩამოხნეს და დაწვეს. ვიდეოკადრები კი ალტ ინფოს გვერდზე გააზიარეს.
• პოლიციამ ისინი ადგილზე დააკავა. ირაკლი მარტინენკო 1000 ლარით დააჯარიმეს, ზურაბ მახარაძის მიმართ კი ადმინისტრაციული საქმის წარმოება დაიწყო, რაც გულისხმობს დროშის ხელმეორედ დაწვის გამო, 2000 ლარით დაჯარიმებას, ან პატიმრობას 15 დღემდე ვადით.
• 23 დეკემბერს პარტიის ორივე ლიდერი გაათავისუფლეს.

რას ამბობს კანონი: საქართველოს ადმინისტრაციულ სამართალდარღვევათა კოდექსის მიხედვით, ფიზიკური პირი, დროშების დაწვის გამო, დაჯარიმდება იმ შემთხვევაში თუ

"საჯარო დაწესებულების მიერ აღმართული/გამოფენილი ევროპის კავშირის, ჩრდილოატლანტიკური ხელშეკრულების ორგანიზაციის ან სხვა საერთაშორისო ორგანიზაციის, რომლის წევრიც არის საქართველო, ოფიციალური სიმბოლოს შებღალვა, ან საჯარო დაწესებულების მიერ აღმართული/გამოფენილი იმ სახელმწიფოს, რომელთანაც საქართველოს აქვს დიპლომატიური ურთიერთობა, დროშის ან გერბის შებღალვა — გამოიწვევს ფიზიკური პირის დაჯარიმებას 1 000 ლარით.

დროშის ან გერბის ხელმეორედ შებღალვის ფაქტი გამოიწვევს ფიზიკური პირის დაჯარიმებას 2 000 ლარით ან ფიზიკური პირის ადმინისტრაციულ პატიმრობას 15 დღემდე ვადით", — წერია კოდექსში.

ბოლო ხაზი: პრორუსული ძალების მიერ ევროკავშირის დროშიც ჩამოხსნის და დაწვის ფაქტი პირველი არ არის. მაგალითად, 2023 წლის მარტში კონსერვატიული პარტიის ლიდერმა, ზურა მახარაძემ, ოთხ ადამიანთან ერთად, საქართველოს პარლამენტის შენობიდან ევროკავშირის დროშა ჩამოხსნა და დაწვა.

• ისინი 1000 ლარით დაჯარიმდნენ და მათზე სისხლისსამართლებრივი დევნა არ დაწყებულა.