რა ხდება: ისრაელის პრემიერ-მინისტრი ბენიამინ ნეთანიაჰუ მოუწოდებს საერთაშორისო საზოგადოებას, ისაუბრონ სექსუალურ ძალადობაზე, გაუპატიურებასა და ადამიანების დასახიჩრებაზე, რომელსაც, მისი თქმით, 7 ოქტომბერს ჰქონდა ადგილი ისრაელის ტერიტორიაზე, ჰამასის მხრიდან.

  • მოსახლეობისადმი მიმართვისას მან თქვა, რომ ელოდება "ყველა ცივილიზებული ქვეყნის ლიდერისგან, მთავრობისგან და ერისგან, რომ ხმას აიმაღლებენ ამ სისასტიკის წინააღმდეგ".
  • "მივმართავ ქალთა უფლებადამცველ ორგანიზაციებს, ადამიანის უფლებადაცველ ორგანიზაციებს: თქვენ ოცოთ ისრაელელი ქალების გაუპატიურების შესახენ, ამ შემზარავი სისასტიკის, სექსუალური დასახიჩრების შესახებ. სად ხართ?"— თქვა მან.

რა მტკიცებულებებია: ადამიანები, რომლებიც ჩართული იყვნენ, ჰამასის თავდასხმების შემდეგ, ისრაელის ტერიტორიაზე გვამების მოძიებისა და ამოცნობის პროცესში, ამბობენ, რომ მათ ნახეს სექსუალური ძალადობის უამრავი ნიშანი, მსხვერპლთა შორის კი იყო ყველა ასაკის ადამიანი — ბავშვები, მოზარდები, ასაკოვანი ქალები...

  • თვითმხილველის მონათხრობი, თუ რა ჩაიდინა ჰამასმა ნოვას მუსიკალურ ფესტივალზე, ისრაელის პოლიციამ ჟურნალისტებს აჩვენა. ის ჰყვება დეტალებს, ჯგუფურად გაუპატიურების და დასახიჩრების შესახებ.
  • BBC წერს, რომ თავდასხმის დღეს ჰამასის მიერ გადაღებული ვიდეოები, სადაც ჩანს შიშველი და სისხლიანი ქალები, ასევე — ფოტოები, რომელიც თავდასხმის შემდეგ არის გადაღებული, აჩვენებს, რომ ქალებზე სექსუალურად იძალადეს.
  • 7 ოქტომბრის თავდასხმებს ისრაელში 1200 ადამიანი ემსხვერპლა, 245-ზე მეტი კი ჰამასმა მძევლად აიყვანა.

რა ხდება ღაზაში: ისრაელის ჯარები უკვე სამხრეთშია, ქალაქ ხან იუნისში, სადაც ჩრდილოეთიდან გაქცეული ასობით ათასი ადამიანი აფარებს თავს.

  • ისრაელის თავდაცვის მინისტრმა, იოავ გალანტმა განაცხადა, რომ რაც უკვე მოხდა ქალაქ ღაზაში, ახლა სწორედ ის ხდება ხან იუნისში.
  • ნეთანიაჰუმ კი მიმართა მათ, ვინც "ცდილობს ისრაელზე გავლენა მოახდინოს" — ისრაელის პრემიერ-მინისტრის თქმით, ერთადერთი გზა, რომ საქმე სწრაფად დასრულდეს, არის გამანადგურებელი ძალის გამოყენება ჰამასის წინააღმდეგ.
  • ამ მიდგომას კი მშვიდობიანი მოსახლეობის დიდი რაოდენობა ეწირება.