დეტალები: ჯანდაცვის სამინისტროს ინფორმაციით, სამედიცინო და ფარმაცევტული საქმიანობის რეგულირების სააგენტომ დაადგინა, რომ 3 სამედიცინო დაწესებულება ფსიქოტროპული მედიკამენტის რეცეპტებს უკანონოდ, საჭირო გამოკვლევების ჩატარების გარეშე გასცემდა.

  • ეს დაწესებულებებია შპს ამბულატორიული კლინიკის თბილისისა და გორის ფილიალები და შპს ჯანმრთელობა ყველასთვის 3.
  • უწყებაში აღნიშნავენ, რომ ამ დაწესებულებებმა, მხოლოდ მიმდინარე წელს, შესაბამისი სამედიცინო შემოწმების გარეშე, ფსიქოტროპული მედიკამენტის 3 457 რეცეპტი გამოწერეს.
  • სამინისტროს ცნობით, დანიშნულების გაცემისას, არ იყო გათვალისწინებული მედიკამენტური მკურნალობის, დოზირების და ხანგრძლივობის პრინციპები და დარღვეული იყო მკურნალობის პროტოკოლი.
  • "კლინიკის დირექტორი და სამედიცინო პერსონალი არაკეთილსინდისიერად მოქმედებდნენ, გამოუსწორებელ ზიანს აყენებდნენ ათასობით პაციენტის სიცოცხლესა და ჯანმრთელობას, ხელს უწყობდნენ ქვეყანაში ძლიერმოქმედი ფსიქოტროპული მედიკამენტების უკანონოდ და უკონტროლოდ მიმოქცევას", — აღნიშნულია განცხადებაში.
  • ჯანდაცვის სამინისტროში ამბობენ, რომ სამივე დაწესებულებას ერთი მესაკუთრე ჰყავს და მათი საქმიანობა მხოლოდ ფსიქოტროპული მედიკამენტის რეცეპტების უკანონოდ გაცემით შემოიფარგლებოდა.
  • საქმე საქართველოს შინაგან საქმეთა სამინისტროს, პროკურატურასა და ფინანსთა სამინისტროს საგამოძიებო სამსახურს გადაეგზავნა.