საქართველოს სახალხო დამცველმა გაეროს რასობრივი დისკრიმინაციის აღმოფხვრის კომიტეტის 93-ე სესიაზე საქართველოს ოკუპირებულ ტერიტორიებზე, რუსეთის ფედერაციის მიერ, რასობრივი დისკრიმინაციის აღმოფხვრის კონვენციის სავარაუდო დარღვევებს მიმოიხილავს.

როგორც სახალხო დამცველის აპარატი ავრცელებს ინფორმაციას, ანგარიში მიმოიხილავს 2013 წლიდან 2017 წლის მაისის ჩათვლით აფხაზეთსა და ცხინვალის რეგიონში ეთნიკურად ქართველი მოსახლეობისადმი დისკრიმინაციულ მოპყრობას, იქ მცხოვრები სხვა ეთნიკურ ჯგუფებთან შედარებით. მათივე ინფორმაციით, ანგარიშში აღნიშნულია საკუთრების უფლების ხელყოფის, მშობლიურ ენაზე განათლებისა და სიცოცხლის უფლების დარღვევის ფაქტები, რომლებიც ოკუპირებულ ტერიტორიაზე მცხოვრებ ქართულ მოსახლეობას ეხებათ.

"აღნიშნული უფლებების დარღვევაზე და დისკრიმინაციულ პოლიტიკაზე საერთაშორისო სამართლებრივი პასუხისმგებლობა რუსეთის ფედერაციას ეკისრება, როგორც ეფექტური კონტროლის განმახორციელებელ ქვეყანას. საქართველოს სახალხო დამცველი რასობრივი დისკრიმინაციის აღმოფხვრის კომიტეტს ასევე სთავაზობს რეკომენდაციებს რუსეთისადმი წარსადგენად," - აღნიშნავს სახალხო დამცველი.

ომბუდსმენის აპარატის ინფორმაციით, რუსეთის ფედერაციის მიერ რასობრივი დისკრიმინაციის აღმოფხვრის კონვენციის შესრულებას კომიტეტი მიმდინარე წლის 3 და 4 აგვისტოს განიხილავს.