On.ge-ს მაისის მოძრაობიდან აცნობეს, რომ შესაბამისი კანონპროექტი საქართველოს პარლამენტში უკვე დაარეგისტრირეს.

დეტალები: "ჩვენს მიერ შემოთავაზებული კანონპროექტი მიზნად ისახავს ქვეყანაში შემოსვლის მსურველ ან შემოსულ რუსეთის მოქალაქეებს დაურიგდეთ კითხვარი, რომელშიც ერთადერთი შეკითხვა იქნება ეთანხმება თუ არა სუბიექტი საქართველოს კონსტიტუციის პირველ მუხლს და აღიარებს თუ არა ჩვენი ქვეყნის ტერიტორიულ მთლიანობას", — აცხადებს მოძრაობა.

  • კანონპროექტის მიხედვით, კითხვაზე უარყოფითი პასუხის გაცემის ან თავის შეკავების შემთხვევაში, რუსეთის მოქალაქეს უარი უნდა ეთქვას ქვეყანაში შემოშვებაზე ან დაექვემდებაროს ქვეყნიდან გაძევებას.

რას ამბობენ ინიციატორები: საქართველოს ტერიტორიის 20 პროცენტის ოკუპაციისა და განგრძობადი ოკუპაციის, ე.წ. "მცოცავი ოკუპაციის" ფონზე, ოკუპირებულ რეგიონებში და მოსაზღვრე ტერიტორიებზე საქართველოს მოსახლეობის დევნიან, ავიწროებენ, იტაცებენ და კლავენ.

  • "იმ ფონზე, როცა მთელი ცივილიზებული სამყარო გმობს რუსულ აგრესიას საქართველოსა და უკრაინაში. საქართველოში ადგილი აქვს რუსეთის მოქალაქეების უკონტროლო შემოსვლას, მათ მიერ ბიზნესის დარეგისტრირებას და უძრავი ქონების შესყიდვას, რაც ქმნის ქვეყნის "რბილი ოკუპაციის საფრთხეს", — წერენ განცხადებაში.

ბოლო ხაზი: მოძრაობა მიიჩნევს, რომ განსაკუთრებული საფრთხის შემცველია საქართველოში იმ რუსი მოქალაქეების შემოსვლა, რომლებიც პირდაპირ საჯაროდ აცხადებენ რომ საქართველო არ არის ოკუპირებული რუსეთის მიერ, რომ აფხაზეთი და სამაჩაბლო საქართველოს ტერიტორია არ არის და ისინი საქართველოსგან გაათავისუფლეს.