საქართველოს პრეზიდენტი, სალომე ზურაბიშვილი ამბობს, რომ თუ ევროკავშირი საქართველოს არ მიანიჭებს კანდიდატის სტატუსს, ეს რუსეთისთვის დიდი გამარჯვება იქნება.

  • ზურაბიშვილმა ამის შესახებ ამერიკული CBS News-ის გადაცემა "60 წუთში" განაცხადა.

კითხვაზე, არის თუ არა საქართველოს პრემიერ-მინისტრი დაინტერესებული ევროკავშირში გაწევრიანებით, პრეზიდენტი ამბობს:

  • "ეს ის კითხვაა, რომელსაც მთელი საზოგადოება სვამს: — ეს ისაა, რაც მათ [მთავრობას] ნამდვილად სურს, თუ ეს მხოლოდ სიტყვებია?"

რას ამბობს სალომე ზურაბიშვილი დასავლეთის მხარდაჭერაზე: ის ფიქრობს, რომ აუცილებელია, აშშ-მა დააფიქსიროს საკუთარი პოზიცია, საქართველოსთვის ევროკავშირის კანდიდატი ქვეყნის სტატუსის მინიჭებასთან დაკავშირებით.

  • "უკვე 5 წელია, პრეზიდენტი ვარ და ამ დროის განმავლობაში, მე ვერ შევძელი საპრეზიდენტო დონის შეხვედრები - იქნებოდა ეს [აშშ-ის] პრეზიდენტთან, თუ ვიცე-პრეზიდენტთან, სატელეფონო საუბარიც კი. მესმის, რომ არსებობს უფრო მწვავე გამოწვევები, მაგრამ ვფიქრობ, რომ მეტი საჯარო აღიარებაა საჭირო. აღიარება იმისა, რომ აშშ მხარს უჭერს ჩვენს კანდიდატის სტატუსს. ვიცი, რომ ეს ის რიტორიკაა, რომელსაც აშშ ჩვენს ევროპელ პარტნიორებთან იყენებს, თუმცა ამის გამეორება უმაღლეს დონეზე, საქართველოს მოსახლეობისათვის, ძალიან მრავლისმეტყველი და მნიშვნელოვანი იქნება," - თქვა სალომე ზურაბიშვილმა.

ინტერვიუს ქართულ ენაზე თარგმანს პრეზიდენტის ადმინისტრაცია ავრცელებს.