რა ხდება: ღაზის საავადმყოფოში მოახერხეს გადაერჩინათ ბავშვი, რომლის ორსული დედა ისრაელის ავიადარტყმის შედეგად დაიღუპა. BBC წერს, რომ ექიმებმა ქალს საკეისრო კვეთა ჩაუტარეს.

დეტალები: ქალი გუშინ, ხან-იუნისის დაბომბვის დროს მძიმედ დაიჭრა, ის საავადმყოფოში გადაიყვანეს.

  • საკეისრო კვეთის დროს ქალი ჯერ კიდევ ცოცხალი იყო და როგორც BBC-ის კორესპონდენტი იუწყება, "საკუთარი და შვილის გადასარჩენად იბრძოდა".
  • ჩვილის მდგომარეობა, ამ დროისთვის, სტაბილურია.

რა მდგომარეობაა საავადმყოფოებში: სამკურნალო დაწესებულებებს საწვავის მარაგი თითქმის მთლიანად ამოეწურათ და მომსახურებას მხოლოდ კრიტიკულ შემთხვევებში უწევენ პაციენტებს.

  • მსოფლიო ჯანდაცვის ორგანიზაციის წარმომადგენლის, რიჩარდ პიპერკორნის თქმით, საავადმყოფოებში გენერატორების მოხმარება მინიმუმამდეა დაყვანილი და მხოლოდ უკიდურეს შემთხვევაში გამოიყენებენ.
  • გაეროში ამბობენ, რომ საწვავის მარაგები ღაზაში დღის ბოლომდე მთლიანად ამოიწურება და მათი სააგენტოს მუშაობა შეწყდება.
  • ასევე, გაეროს ინფორმაციით, ამ დროისთვის ღაზაში საავადმყოფოების მესამედი, ომის შედეგად, უკვე დანგრეულია.
  • ისრაელის მტკიცებით კი, ღაზაში საწვავი არის, თუმცა ჰამასი საკუთარი მარაგების შესავსებად იყენებს.
  • ისრაელმა ელექტროენერგიის მიწოდება ღაზის სექტორს 7 ოქტომბერს, ჰამასის თავდასხმების შემდეგ შეუწყვიტა.

ბოლო ხაზი: ისრაელსა და ჰამასს შორის ომი უკვე მეცხრამეტე დღეა გრძელდება.