საქართველოს პრეზიდენტმა გიორგი მარგველაშვილმა, ამერიკის შეერთებული შტატების საელჩოში, დამოუკიდებლობის დღისადმი მიძღვნილ ღონისძიებაზე სიტყვით გამოსვლისას, მოუწოდა საქართველოს ხელისუფლებას, გააგრძელოს კონსტიტუციის რეფორმაზე მსჯელობა საზოგადოებასთან და პოლიტიკურ პარტიებთან:

"მიმდინარე პოლიტიკური კონტექსტიდან მე მინდა მივესალმო ბატონი პრემიერ-მინისტრის წინადადებას აქტიური დიალოგისკენ საზოგადოებასთან და პოლიტიკურ პარტიებთან, კონსტიტუციის მიღების პროცესში. მე მინდა მოვუწოდო პოლიტიკურ ძალებს, პოლიტიკურ ოპოზიციას, საზოგადოებრივ ძალებს, აქტიურად ჩაერთონ კონსტიტუციის განხილვის პროცესში, რათა კონსტიტუცია შედგეს როგორც თანხმობის, როგორც ერის გამაერთიანებელი დოკუმენტი, ისე, როგორც დამფუძნებელმა მამებმა დამოუკიდებლობის დეკლარაციიდან სულ რამდენიმე წელიწადში შექმნეს აშშ-ის კონსტიტუცია. მე მინდა მოვუწოდო საპარლამენტო უმრავლესობას, არ იძალადოს პოლიტიკურ პროცესზე და აქტიურად ჩაერთონ დიალოგში საზოგადოებასთან და პოლიტიკურ ოპოზიციასთან."

გიორგი მარგველაშვილმა ამერიკელ ხალხს დამოუკიდებლობის დღე მიულოცა და შტატების დამოუკიდებლობის დეკლარაციის მნიშვნელობაზე ისაუბრა: "ამ დეკლარაციის ავტორები ამბობენ, რომ ადამიანი გაჩენილია თავისუფალი უფლებით ესწრაფოდეს ბედნიერებას და ამ განცხადებას ხელს აწერენ თავისი ქონებით, სიცოცხლითა და ღირსებით. სწორედ ამ მაღალი იდეალების მსახურებაში, ჩვენ ვართ ამაყი, რომ ვართ თქვენი მოკავშირეები".