საფრანგეთის ერთ-ერთ სკოლაში შეიარაღებული პირის შეჭრას მსხვერპლი მოჰყვა. პოლიციის ცნობით, წარმოშობით ჩეჩენმა, 30 წლამდე ასაკის კაცმა, რომელიც ისლამურ რადიკალიზმთან იყო დაკავშირებული, სასწავლო დაწესებულებაში ფრანგული ენის პედაგოგი ცივი იარაღის გამოყენებით მოკლა, კიდევ ერთი მასწავლებელი და დაცვის თანამშრომელი კი — დაჭრა. დამნაშავე პოლიციამ უკვე დააკავა.

ფრანგული მედია იტყობინება, რომ ბრალდებული ამავე სკოლის ყოფილი მოსწავლე იყო. თვითმხილველების თქმით, თავდასხმისას კაცი ფრაზას "ალაჰუ აკბარ" [არაბ. "ალაჰი უდიდესია"] ყვიროდა. ტელეარხ BFMTV-ის ცნობით, პოლიციამ დამნაშავის ძმაც დააკავა.

საფრანგეთის ანტიტერორისტულ სამსახურში აცხადებენ, რომ ამჟამად მიმდინარეობს გამოძიება, ერია თუ არა მომხდარ დანაშაულში რომელიმე ტერორისტული დაჯგუფების ხელი.

ფოტო: AFP

მსგავსი შემთხვევა საფრანგეთში, დაახლოებით, სამი წლის წინაც მოხდა. მაშინ ფრანგ პედაგოგს, სამუელ პატის, გაკვეთილზე მუჰამედის კარიკატურის ჩვენების გამო 18 წლის ჩეჩენმა აბდულახ ანზოროვმა თავი მოჰკვეთა. ანზოროვი მოგვიანებით პოლიციასთან დაპირისპირების დროს მოკლეს. მაშინ საფრანგეთის პრეზიდენტმა ემანუელ მაკრონმა პატის "გმირი" უწოდა და სიკვდილის შემდეგ საპატიო ლეგიონის ორდენით დააჯილდოვა. ამის გამო, ჩეჩნეთის ლიდერმა რამზან კადიროვმა მაკრონი "პროვოკაციების მხარდაჭერაში" დაადანაშაულა და თქვა, რომ პრეზიდენტი "მუსლიმებს დანაშაულის ჩადენისკენ უბიძგებდა". მაკრონს "მსოფლიოს N1 ტერორისტი" უწოდა ჩეჩნეთის მუფთიმაც.

აღსანიშნავია, რომ სწორედ კარიკატურების გამო, საფრანგეთში რამდენიმე წლის წინ უფრო მასშტაბური ტერორისტული თავდასხმა მოხდა. 2015 წლის 7 იანვარს ისლამური ტერორისტული დაჯგუფების წევრები სატირული ჟურნალის, Charlie Hebdo, რედაქციაში შეიჭრნენ და ცეცხლი გახსნეს. ტერაქტს 12 ადამიანის სიცოცხლე ემსხვერპლა.