დეტალები: შინაგან საქმეთა სამინისტროს განცხადებით, საპატრულო პოლიციის თანამშრომლებმა, გადამოწმების მიზნით თბილისში რუსეთის მოქალაქე შეაჩერეს, რა დროსაც პირადი ჩხრეკისას 244 შეკვრად დაფასოებული ნარკოტიკული საშუალება ამოიღეს.

  • მათივე თქმით, საგამოძიებო მოქმედებების შედეგად დამატებით ამოიღეს 998.87 გრამი ნარკოტიკული ნივთიერება, რომლის ნაწილსაც ბრალდებული დაცულ საცავში ინახავდა, ხოლო ნაწილი განთავსებული ჰქონდა კონკრეტულ ლოკაციაზე მისი შემდგომი რეალიზაციის მიზნით.
  • გამოძიება სისხლის სამართლის კოდექსის 260- ე მუხლის 1-ლი და 18-260- ე მუხლის მე-4 ნაწილებით მიმდინარეობს — დანაშაული 15 წლამდე ვადით თავისუფლების აღკვეთას ითვალისწინებს.
  • გარდა ამისა, სამეგრელო-ზემო სვანეთის პოლიციის დეპარტამენტის დეტექტივებმა განსაკუთრებით დიდი ოდენობით ნარკოტიკული საშუალების უკანონო შეძენა შენახვა-გასაღება და საქართველოში უკანონოდ შემოტანის ბრალდებით უკრაინის მოქალაქე დააკავეს.
  • უწყების განცხადებით, სამართალდამცველებმა ის ხობის მუნიციპალიტეტის ერთ-ერთ სოფელში დააკავეს, პირადი ჩხრეკისას 102 შეკვრად დაფასოებული ნარკოტიკული საშუალება მეთადონი ნივთმტკიცებად ამოიღეს, ხოლო, მისი მითითებული ადგილებიდან განსაკუთრებით დიდი ოდენობით — 156 შეკვრად დაფასოებული ნარკოტიკული საშუალება ამოიღეს.
  • გამოძიება საქართველოს სისხლის სამართლის კოდექსის 260-ე მუხლი მე-6, მე-7 ნაწილებით, ასევე, 262 -ე მუხლის მე-4 ნაწილით მიმდინარეობს.
  • დანაშაული 20 წლამდე ან უვადო თავისუფლების აღკვეთას ითვალისწინებს.