ტომ ჰოლანდს თქვენ შეიძლება სპაიდერმენად იცნობდეთ, ან უკვე — როგორც დენი სალივანს ახალ სერიალში The Crowded Room, თუმცა, ინგლისელი მსახიობის ერთ-ერთ ყველაზე პოპულარულ "როლად" რიანა რჩება. ყოველ შემთხვევაში, თავად ჰოლანდიც აღიარებს, რომ ბარბადოსელი პოპვარსკვლავის განსახიერებისთვის ყველაზე ხშირად აქებენ ხოლმე.

ყველაფერი კი 2017 წელს დაიწყო, როცა ტომი ამერიკულ მუსიკალურ რეალითი შოუში, Lip Sync Battle, გამოჩნდა. ამ გადაცემაში ვარსკვლავები ერთმანეთს მუსიკალური პერფორმანსის "პლუს-ფონოგრამაზე" გაცოცხლებაში ეჯიბრებიან. შოუში ერთიმეორეს ჰოლანდი და ადამიანი-ობობაში მასთან ერთად მონაწილე ზენდეია დაუპირისპირდნენ. ჰოლანდმა, არც მეტი, არც ნაკლები, რიანას ჰიტზე Umbrella "იმღერა" და სცენაზე ისეთი სანახაობა მოაწყო, დარბაზში აპლოდისმენტები არ წყდებოდა. ტომის პერფორმანსს იუთუბზე ამ დროისთვის 144 მილიონზე მეტი ნახვა აქვს.

ექვსი წლის შემდეგ, მსახიობმა თავისი გამოსვლა გაიხსენა და მის პოპულარობაზეც ისაუბრა.

"არაჩვეულებრივი დრო იყო", — ჰყვება ჰოლანდი, — "ცხოვრება ჩემ თვალწინ იცვლებოდა. ადამიანი-ობობა გამოდიოდა, მე კი აღმავლობის გზას ვადექი. პირველად შემეძლო, შეთავაზებებზე უარი მეთქვა, რაც დაუჯერებელი იყო".

იმ დროისთვის ტომი მართლაც მარველის ამომავალი ვარსკვლავი გახლდათ და პერფორმანსის ასეთი წარმატება ალბათ ამ ფაქტორმაც განაპირობა. თუმცა, შოუში მსახიობმა მაყურებელი თავისი მოძრაობებითა და სასცენო ჩაცმულობითაც აღაფრთოვანა. ინტერვიუერის შეკითხვაზე, იყო თუ არა ეს მისი განაცხადი ტოქსიკური მასკულინობის საპასუხოდ, ჰოლანდი ამბობს:

"მე ყველაზე არა-ტოქსიკურმასკულინურ გარემოში გავიზარდე; ამდენად, არც მიფიქრია, რომ რამე უჩვეულოს ვაკეთებდი".

თუმცა, მსახიობის თქმით, პერფორმანსის პოპულარობის მიუხედავადაც, დღეს მსგავსს ვეღარ გაიმეორებდა.

"ჩემთვის საამაყო როლების მიუხედავად, ამ პერფორმანსის გამო ყველაზე ხშირად მაქებენ ხოლმე", — ამატებს ჰოლანდი.

მსახიობის ამ დროისთვის ბოლო პროექტი თრილერის ჟანრის სერიალი The Crowded Room არის. დენიელ კიზის ბესტსელერის, ბილი მილიგანის მრავალი გონების, მიხედვით გადაღებული სერიალის ჩვენება Apple TV+-ზე ივნისში დაიწყო. თუმცა, ჰოლანდის თქმით, ამ როლმა ისე დაღალა, რომ ერთწლიანი პაუზის აღება და მსახიობობისთვის დროებით თავის დანებება გადაწყვიტა.