განათლების მინისტრი, ალექსანდრე ჯეჯელავა, დემირელის კოლეჯის დაკავებული მენეჯერის, მუსტაფა ემრე ჩაბუქის საქმესთან დაკავშირებით ამბობს, რომ ამას განათლების სამინისტროსთან საერთო არაფერი აქვს:

"სკოლის დირექტორობასთან ეს კავშირში არანაირად არ არის, ამიტომ ეს განათლებასთან დაკავშირებული საკითხი არ არის. მე ვფიქრობ, რომ ჩვენ გვაქვს კანონი, წესები, რომელიც არის ადაპტირებული ევროპულ კანონმდებლობასთან. განიხილავენ და მიიღებენ სამართლიან გადაწყვეტილებას".

მუსტაფა ემრე ჩაბუქს, ლტოლვილთა და განსახლების სამინისტროს სტატუსის დამდგენი განყოფილების უფროსი ადვოკატთან ერთად, სასჯელაღსრულების მერვე დაწესებულებაში ხვდება. შედეგად, უნდა გადაწყდეს, მიენიჭება თუა არა მას საქართველოში ლტოლვილის სტატუსი. დადებითი პასუხის შემთხვევაში მისი სხვა ქვეყანაში ექსტრადირება ვეღარ მოხდება.

მუსტაფა ემრე ჩაბუქს თბილისის საქალაქო სასამართლომ წინასაექსტრადიციო სამთვიანი პატიმრობა შეუფარდა. მოსამართლემ პროკურატურის შუამდგომლობა დააკმაყოფილა. ხელისუფლებას ჩაბუქის გათავისუფლებისკენ და თურქეთისთვის არგადაცემისკენ მოუწოდა რვა არასამთავრობო ორგანიზაციამ.