ჰოლი ბერი პირველი და ამ დრომდე ერთადერთი ფერადკანიანი ქალია, რომელმაც ოსკარი საუკეთესო მსახიობი ქალის ნომინაციაში მიიღო. თუმცა, როგორც ცოტა ხნის წინ განაცხადა, ეს ისტორიული გამარჯვება მისთვის საერთოდ არაფერს ნიშნავს.

"როდესაც მოვლენებს აკვირდები და ხვდები, რომ შენ შემდეგ არაფერი შეცვლილა და ისევ შენ ხარ ის ერთადერთი ფერადკანიანი ქალი, ვინც ოსკარი საუკეთესო მსახიობი ქალის ნომინაციაში მიიღო, ასკვნი რომ ეს გამარჯვება შენთვის აღარაფერს ნიშნავს. 15 წელი გავიდა და ერთადერთი ვარ ვინც სცენაზე ამ ჯილდოს ასაღებად ავიდა, ეს არ არის სწორი", ამბობს ჰოლი ბერი.

შეგახსენებთ, რომ ბერიმ ოსკარი 2002 წელს საუკეთესო მსახიობი ქალის ნომინაციაში მიიღო ფილმისთვის მონსტრების მეჯლისი.

"მინდა მეტი დრო დავუთმო პროდიუსინგს, მინდა ფერადკანიან მსახიობ ქალებს დავეხმარო. მე ამ თემაზე გამუდმებით ვესაუბრები ამერიკის კინოაკადემიას, იმედი მაქვს ერთად გამოვნახავთ სწორ გზას", თქვა ჰოლი ბერიმ.

აღსანიშნავია ის ფაქტიც, რომ 2016 წელს ბევრმა მსახიობმა ოსკარს ბოიკოტიც გამოუცხადა. შარშანდელი პროტესტი ერთი მთავარი საკითხით იყო ინსპირირებული: ზედიზედ ორი წლის განმავლობაში საშემსრულებლო კატეგორიებში არც ერთი აფროამერიკელი მსახიობი არ იყო წარდგენილი. ბოიკოტისკენ მსახიობებს უილ სმიტის მეუღლემ, ჯადა პინკეტ სმიტმა მოუწოდა და თქვა, რომ ოსკარის დაჯილდოებაზე აფროამერიკელების დანახვა ყოველთვის უხარიათ, ოღონდ, მხოლოდ იმ შემთხვევაში, თუ ისინი ხალხს აცინებენ და ჯილდოებს არიგებენ.

მას შემდეგ, რაც ზოგიერთმა ვარსკვლავმა ოსკარის დაჯილდოების ცერემონიალს ბოიკოტი გამოუცხადა, ამერიკული კინოაკადემიის მესვეურებმა სერიოზული გადწყვეტილება მიიღეს. აკადემიის პრეზიდენტმა შერილ ბუნ აიზეკმა სპეციალური განცხადება გააკეთა და აღნიშნა, რომ აკადემიას მნიშვნელოვანი ნაბიჯების გადადგმა მოუწევს. 2016 წლიდან კინოაკადემიის წევრთა ჯგუფი მრავალფეროვანი გახდა ყველა კუთხით, სქესის, რასის, ეროვნებისა და სექსუალური ორიენტაციის ჩათვლით.

2017 წლის ოსკარზე კი ისტორიაში პირველად, საუკეთესო სცენარების კატეგორიაში ორი აფროამერიკელი იყო წარდგენილი. მსახიობი ვაიოლა დევისი კი ისტორიაში პირველი აფროამერიკელი გახდა, რომელიც მესამედ წარადგინეს ოსკარზე და საბოლოო ჯამში პრიზიც გადასცეს, თუმცა ამ შემთხვევაში როგორც საუკეთესო მეორეხარისხოვანი როლის შემსრულებელ ქალ მსახიობს.