რატომ არის მნიშვნელოვანი: 2 მარტს, როცა პარლამენტის შენობაში და მიმდებარედ მედიისა და არასამთავრობო სექტორის წარმომადგენლები რუსულ კანონპროექტს აპროტესტებდნენ, On.ge-ის რედაქტორი, ნეტგაზეთის ჟურნალისტი და ფორმულას ფოტოგრაფი საკანონმდებლო ორგანოს ეზოდან ფიზიკური ძალის გამოყენებით გააძევეს.

• სამივე მათგანზე დაშვებული იყო პარლამენტში საქმიანობის საშვი, შესაბამისად, ჟურნალისტებს პროფესიული მოვლენების კანონიერად შესრულებაში ხელი შეუშალეს.
• პარლამენტის ტერიტორიიდან გაძევებამდე, On.ge-ის რედაქტორი, თამუნა გეგიძე დაცვის თანამშრომელს უხსნიდა, რომ საშვი აქვს და ტერიტორიაზე კანონიერად იმყოფებოდა.
• მიუხედავად ამისა, მას საუბარი გააწყვეტინეს და 2-მა პირმა ტერიტორიიდან ძალის გამოყენებით გაიყვანა.
• ამავე მეთოდით გააძევეს იქვე მყოფი ნეტგაზეთის ჟურნალისტი, მიხეილ გვაძაბია და ფორმულას ფოტოგრაფი, ვახო ქარელი, რომლებსაც აკრედიტაცია ჰქონდათ.
• მედიაომბუდსმენი რუსული კანონის წინააღმდეგ გამართული აქციების გაშუქებისას დაზარალებული 21 ჟურნალისტისა და ოპერატორის ინტერესებს იცავს.

ვის მიმართა მედიაომბუდსმენმა მანამდე: ის ითხოვდა, რომ ჟურნალისტების პარლამენტიდან გაძევების საქმეზეც დაზუსტებულიყო კვალიფიკაცია, თუმცა ამ დრომდე უშედეგოდ.

• შესაბამისად, პროკურატურას განმეორებით გაუგზავნა მოთხოვნა საქმეზე სისხლის სამართლის 154-ე, ჟურნალისტისათვის პროფესიულ საქმიანობაში უკანონოდ ხელის შეშლის მუხლით კვალიფიკაციის დაზუსტების შესახებ.
• მედიაომბუდსმენი, ასევე, ითხოვდა ინფორმაციას საქართველოს პარლამენტში გატარებული ზომებისა და რეაგირების შესახებ, რადგან ინციდენტის შემდეგ ჟურნალისტებმა ოფიციალური წერილით პარლამენტის თავმჯდომარესაც მიმართეს.
• სპეციალური საგამოძიებო სამსახურში ამბობდნენ, რომ იმის გათვალისწინებით, რომ ქარელი, გეგიძე და გვაძაბია არ წარმოადგენენ შესაძლო დანაშაულის მსხვერპლებს, მოკლებული არიან შესაძლებლობას, დააკმაყოფილონ მოთხოვნა სისხლის სამართლის საქმის მასალების გაცნობაზე.
• სწორედ ამ მიზეზით მედიაომბუდსმენმა On.ge-ის რედაქტორისთვის სავარაუდო მსხვერპლის სტატუსის მინიჭების მოთხოვნით სპეციალურ საგამოძიებო სამსახურს მიმართა.

ვის მიმართავს ახლა: მედიაომბუდსმენი ამჯერად კიდევ ერთხელ მიმართავს გენერალურ პროკურორს, ირაკლი შოთაძეს სისხლის სამართლის კოდექსის 154-ე მუხლით კვალიფიკაციის დაზუსტების შესახებ.

• წინა შემთხვევაში საქმის ზედამხევდელი პროკურორის 25 მაისის წერილით მედიაომბუდსმენს ეცნობა, რომ "საქმეზე მიმდინარეობს გამოძიება, ტარდება ყველა აუცილებელი საგამოძიებო და საპროცესო მოქმედება".
• ასევე, ნათქვამი იყო, რომ საქმეზე შერებილი მტკიცებულებების ანალიზის შემდეგ, სათანადო ნიშნებისა და საფუძვლების გამოკვეთის შემთხვევაში, საქმეს კვალიფიკაციას შეუცვლიდნენ.
• გარდა ამისა, მედიაომბუდსმენი მიმართავს სასამართლოსაც.
• ასევე, ითხოვს 2023 წლის 5 მარტიდან დღემდე ინფორმაციას პარლამენტში ჟურნალისტთა უფლებების დარღვევის გამოვლენის შემდეგ გატარებულ ზომებსა და რეაგირებაზე.

მედიაომბუდსმენმა ჟურნალისტებისთვის და ოპერატორებისთვის აკრედიტაციის შეჩერებაზე მასალების მოუწოდებლობის გამო პარლამენტის წინააღმდეგ სარჩელი მოამზადა.

• მედიაომბუდსმენი ხაზს უსვამს, რომ პაპუაშვილმა ჟურნალისტების უფლებების დაცვის მიზნით წარდგენილი ადმინისტრაციული საჩივარი არ განიხილა.
• "პარლამენტის უმოქმედობა არღვევს როგორც მედიის წარმომადგენლების უფლებებს, ასევე შეუძლებელს ხდის სააადვოკატო საქმიანობის სრულყოფილად შესრულებას. აღსანიშნავია ისიც, რომ აკრედიტაციის ხარვეზებზე მსჯელობას და საქმისწარმოებას შალვა პაპუაშვილმა "აბსოლუტური დეზინფორმაცია და ტყუილი" უწოდა.
• მანამდე ორგანიზაციამ ორჯერ მოითხოვა ინფორმაცია ჟურნალისტებისა და ოპერატორების უფლებების შეზღუდვის საფუძვლებზე.
• ნათქვამია, რომ აკრედიტაციის წესი არღვევს მედიის წარმომადგენლების და საზოგადოების უფლებას, მიიღოს და გაავრცელოს ინფორმაცია საკანონმდელო ორგამოში მიმდინარე პოლიტიკურ პროცესებზე და ეს პრაქტიკა მედიაზე პოლიტიკური ანგარიშსწორების ბერკეტი ხდება.
• ორგანიზაციამ დისკრიმინაციის დასადგენად სახალხო დამცველს მიმართა, ხოლო აკრედიტაციის წესის ნაწილობრივ ბათილად ცნობით მოთხოვნით საქალაქოში შეიტანა სარჩელი.