არტისტმა ანდრო დადიანმა საქართველოს საპატრიარქოსთან თავისი ახალი ინსტალაცია — ხორცის ფარი განათავსა. ანდრო დადიანის განმარტებით, ხორცის ფარი საქართველოს საპატრიარქოს მეტაფორული პორტრეტია, რადგან მისი აზრით, ამ ინსტიტუციის საქმე ადამიანების მენტალურად, ეკონომიკურად, სოციალურად გატყავება და გამოშიგვნაა.

"10 წელი გავიდა 2013 წლის 17 მაისიდან, ტრაგიკულ მოვლენებს სახელებს ვერ ვარქმევთ ხოლმე და ასეთი უსახელო დღეა ჩვენს უახლეს ისტორიაში 17 მაისი, როგორც 9 აპრილი, 7 ნოემბერი, 20 ივნისი, 13 ივნისი და ა.შ. ეს დღე ქართული მართლმადიდებლური ეკლესიისგან ქვეყნის სულიერი, ეროვნული, კულტურული, ქრისტიანული, სოციალური, სახელმწიფოებრივი დამარცხების დღეა", — წერს ანდრო დადიანი ფეისბუქზე.

ანდრო დადიანმა ისიც დასძინა, რომ ჰომოფობია ქართველი ადამიანის კულტურული საჭიროება კი არა, ქვეყნის გეოპოლიტიკური ორიენტაციის გამოკვეთის საშუალებაა. ანდროს თქმით, ქართულმა მართლმადიდებლურმა ეკლესიამ ადამიანის მხარდაჭერის ნაცვლად პოლიტიკური პოზიცია დაიკავა და საკუთარი ერის მოწინააღმდეგე სტრუქტურულ მოძალადედ ჩამოყალიბდა.

"ჩვენ უნდა გამოვათრიოთ დუმილით ძალმოსილი ეს დღის წესრიგი საჯარო სივრცეში, ხშირი დისკუსიით თავიდან უნდა მივანიჭოთ მნიშვნელობები საზოგადოებრივი საჭიროების მიხედვით მას, მაშინ როცა სასულიერო პირები ზემოთ და ზემოთ ხტებიან, ახალ სიმაღლეებს იპყრობენ ადამიანისა და სიცოცხლის მნიშვნელობის მოსპობაში", — ვკიხულობთ დადიანის პოსტში.

შეგახსენებთ, რომ 2013 წლის 17 მაისს ჰომოფობიისა და ტრანსფობიის წინააღმდეგ ბრძოლის დღეს გამოსული ადამიანები დაარბიეს, მათ შორის სასულიერო პირებმაც. ამ ფაქტის შემდეგ საქართველოს საპატრიარქომ 17 მაისი ოჯახის სიწმინდის დღედ გამოაცხადა.