რა მოხდა: 10 მაისს მოქალაქემ, გიორგი ფხალაძემ სოციალურ ქსელში დაწერა, რომ რუსეთთან პირდაპირი ფრენების აღდგენის გამო თბილისის საერთაშორისო აეროპორტში მუშაობას წყვეტს.

  • "არ მოვემსახურები რუსეთიდან პირდაპირი რეისით ჩამოფრენილებს. დავწერე განცხადება სამსახურიდან წასვლის შესახებ და 19 მაისიდან აღარ ვიმუშავებ თბილისის საერთაშორისო აეროპორტში", — ეწერა პოსტში.
  • როგორც On.ge-ის ფხალაძემ უთხრა, აეროპორტში 10 წელზე მეტხანს იმუშავა, ბოლოს კი მოლარე-ოპერატორის პოზიცია ეკავა.

TAV Georgia-მ, რომელიც თბილისისა და ბათუმის საერთაშორისო აეროპორტების მმართველი კომპანიაა, დღეს ყოფილი თანამშრომლის საპასუხო განცხადება გაავრცელა.

  • მათი თქმით, ფხალაძის სტატუსი არაერთ უზუსტობას შეიცავს და მან სამსახურიდან წასვლაზე განცხადებით კომპანიის ადამიანური რესურსების მართვის სამსახურს პირველ მაისს მიმართა.
  • "შესაბამისად, მის მიერ სამსახურის დატოვება ვერანაირ კავშირში ვერ იქნება რუსული ავიაკომპანიებისთვის საქართველოში ფრენებზე აკრძალვის მოხსნასთან, რის შესახებაც 10 მაისს გახდა ცნობილი", — ამბობენ TAV Georgia-ში.
  • მათივე განცხადებით, ფხალაძე აეროპორტის ავტოსადგომის მოლარე-ოპერატორად მუშაობდა და არანაირი შეხება არ ჰქონია საჰაერო ხომალდების მომსახურებასთან.
  • "სრულიად უადგილოა მისი მხრიდან საუბარი იმაზე, რომ "რუსეთიდან პირდაპირი რეისით ჩამოფრენილებს არ მოემსახურება", — განმარტავენ კომპანიაში.
  • გარდა ამისა, ტელეკომპანია იმედმა გაავრცელა დოკუმენტი, საიდანაც, მათივე თქმით, დგინდება, რომ ფხალაძემ განცხადება მართლაც პირველ მაისს დაწერა.

გიორგი ფხალაძე უარყოფს ფაქტობრივ უზუსტობას, რომელზეც TAV Georgia საუბრობს.

  • ის ისევ იმეორებს, რომ სამსახურიდან წამოსვლაზე განცხადება 10 მაისს დაწერა.
  • "პირველ რიგში, გასაკვირია კერძო კომპანიას რატომ დასჭირდა პასუხის გაცემა, როცა მას არავინ ადანაშაულებს ფრენების აღდგენაში? იმიტომ ხომ არა, რომ კომპანია აქტიურად თანამშრომლობს სუს-თან და მიიღეს მითითება ეპასუხათ?", — წერს ის.
  • ფხალაძის თქმით, მისი მომსახურებით ჩამოსული მგზავრებიც სარგებლობდნენ, რასაც აეროპორტის მმართველი კომპანია უარყოფს.