საქართველოს მართლმადიდებელი ეკლესიის საპატრიარქოში ე.წ. ციანიდის საქმეზე ბრალდებული დეკანოზ გიორგი მამალაძის ოჯახსა და პატრიარქს, ილია მეორეს შორის შეხვედრა დასრულდა. მამალაძის ოჯახის წევრებმა საპატრიარქო რამდენიმე წუთის წინ დატოვეს.

"პატრიარქმა როგორც გერმანიიდან ჩამოსვლის შემდეგ, დააფიქსირა ისევ ის პოზიცია და თქვა რომ მე მამა გიორგისგან არასდროს გამიგია ცუდიო და ეს ყველაფერი საქართველოს დისკრედიტაციის საქმე არისო," - აღნიშნა დეკანოზის ძმამ, თორნიკე მამალაძემ, შეხვედრის შემდეგ.

მისი თქმით, მამა დავით ჭინჭარაული ცდილობდა საუბარი კითხვებით შეეწყვეტინებინა.

დეკანოზი გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად.

გიორგი მამალაძე წარდგენილ ბრალდებას არ აღიარებს, პროკურატურა კი საპირისპიროს ამტკიცებს. მათ გაავრცელეს ფარული ვიდეოჩანაწერები, რაც, საგამოძიებო უწყების ცნობით, მამალაძის საქმეში ერთ-ერთი მთავარი მტკიცებულებაა.