ცეცხლის შეწყვეტის შეთანხმების მიუხედავად სუდანში ბრძოლები გრძელდება.

დეტალები: მიგრაციის საერთაშორისო ორგანიზაციის (IOM) ცნობით, გაეროს თანამშრომლის მანქანას ქალაქ ხარტუმის სამხრეთ-დასავლეთით ცეცხლი გაუხსნეს.

  • "ძალიან დამწუხრებული ვარ ჩვენი კოლეგის გარდაცვალების გამო და მის მეუღლეს, ახალშობილ შვილს და ჩვენს გუნდს სუდანში სამძიმარს ვუცხადებ", — განაცხადა IOM-ის გენერალურმა დირექტორმა, ანტონიო ვიტორინომ.
  • IOM-ის ცნობით, მათი 49 წლის თანამშრომელი ოჯახთან ერთად მოგზაურობდა დედაქალაქ ხარტუმის სამხრეთ-დასავლეთით მდებარე ქალაქ ელ ობეიდთან, როდესაც მას ესროლეს.
  • გაეროს ოთხი თანამშრომელი დაიღუპა სუდანში მას შემდეგ, რაც ექვსი დღის წინ ბრძოლები დაიწყო.

რატომ არის მნიშვნელოვანი: უახლესი ცნობებით, შეტაკებებს ამ დროისთვის სულ მცირე 350 ადამიანი ემსხვერპლა, დაშავებულთა რაოდენობა კი 1 100-ს აღწევს.

  • მსოფლიო ლიდერები ცდილობდნენ ზეწოლას მოახდინონ ორივე მხარეზე, რათა ცეცხლის შეწყვეტას მიაღწიონ და საკუთარი მოქალაქეების ევაკუაცია შეძლონ.
  • "ბრძოლა უნდა შეწყდეს", — განაცხადა უსაფრთხოებისა და საგარეო ურთიერთობების საკითხებში ევროკავშირის უმაღლესმა წარმომადგენელმა, ჯოზეფ ბორელმა ბრიუსელში.
  • მისი ცნობით, სუდანში ევროკავშირის ელჩს, აიდან ოჰარას საკუთარ რეზიდენციაში თავს დაესხნენ.

კონტექსტი: სუდანი, სიდიდით მესამე ქვეყანა აფრიკაში, მდებარეობს არასტაბილურ და გეოპოლიტიკურად მნიშვნელოვან რეგიონში.

  • კონფლიქტი მას შემდეგ გამწვავდა, რაც დაპირისპირებულმა მხარეებმა ქვეყნის სამოქალაქო მმართველობაზე გადასვლასთან დაკავშირებით შეთანხმებას ვერ მიაღწია.
  • სუდანი ესაზღვრება შვიდ ქვეყანას, რომელთაგანაც თითოეულს უსაფრთხოების გამოწვევები აქვს, რაც გადაჯაჭვულია ხარტუმის პოლიტიკასთან.