ამოღებული ნივთების ფოტოები თავად შინაგან საქმეთა სამინისტრომ გაავრცელა.

რატომ არის მნიშვნელოვანი: შსს-ს ცნობით, სამართალდამცველების მიერ ადმინისტრაციულ სამართალდარღვევათა კოდექსის 166-ე და 173-ე მუხლების შესაბამისად, ჯამში 76 პირია დაკავებული.

  • დღეს გავრცელდა კადრები, სადაც რუსთაველზე სამართალდამცავები მოქალაქეებს აჩერებენ და ჩანთებს უმოწმებენ.
  • მოქალაქის კითხვაზე, რა უფლებით ამოწმებენ ხალხს, პოლიცია ეუბნება: "წამობრძანდით და განახებთ. ახლა სად ამოგიღოთ კანონი. არ ვარ ვალდებულები ზეპირად ვიცოდე".

დეტალები: შსს აცხადებს, რომ "საპროტესტო აქციის უსაფრთხოდ ჩატარებისა და მართლწესრიგის დაცვის მიზნით", პოლიციელთა კანონიერი მოთხოვნისადმი დაუმორჩილებლობის ბრალდებით, ადმინისტრაციულ სამართალდარღვევათა კოდექსის 173-ე მუხლის შესაბამისად, ადმინისტრაციული წესით, კიდევ 10 პირი დააკავა.

  • "შინაგან საქმეთა სამინისტროს შესაბამისი დანაყოფების თანამშრომლები საზოგადოებრივ წესრიგის დაცვის მიზნით მობილიზებული არიან პარლამენტის შენობის მიმდებარე ტერიტორიაზე და "პოლიციის შესახებ" საქართველოს კანონის 22-ე მუხლით განსაზღვრული უფლებამოსილების ფარგლებში ახდენენ აქციის მონაწილეთა გადამოწმებას და დათვალიერებას".

გარდა ამისა, შინაგან საქმეთა სამინისტროს ცნობით, 7 მარტს პარლამენტის მიმდებარე ტერიტორიაზე გამართული საპროტესტო აქციის დროს პოლიციელებზე განხორციელებულ თავდასხმის ფაქტზე, საქართველოს სისხლის სამართლის კოდექსის 353-ე პრიმა მუხლით, ერთი პირი დააკავეს.

  • უწყებაში ამბობენ, რომ იდენტიფიცირებულია კიდევ რამდენიმე პირი, რომელთა დაკავების მიზნით მიმდინარეობს შესაბამისი ღონისძიებები.