ამის შესახებ საერთაშორისო გამჭვირვალობა — საქართველოს ანგარიშშია საუბარი.

რატომ არის მნიშვნელოვანი: დეზინფორმაციასთან ბრძოლა საქართველოსთვის მნიშვნელოვანი გამოწვევაა.

• განსაკუთრებით, რუსეთ-უკრაინის ომის ფონზე, როცა პროპაგანდა ბრძოლის იარაღად იქცა, საქართველო კი რუსეთის საინფორმაციო ომის ერთ-ერთ მთავარ სამიზნედ რჩება.
• Facebook-მა არაერთხელ წაშალა დეზინფორმაციული რუსული ქსელები, რომელთა მიზანიც საქართველოს პოლიტიკაში ჩარევა იყო.
• ასევე, წაიშალა სხვადასხვა პოლიტიკურ პარტიასთან, მათ შორის, ქართულ ოცნებასთან დაკავშირებული არაავთენტურ ქმედებებში ჩართული გვერდები.
• ვხედავთ, როგორ ესხმიან თავს არაიდენტიფიცირებადი თუ იდენტიფიცირებადი პროფილები უმცირესობებს, აქტივისტებს, ოპოზიციონერ პოლიტიკოსებს, არასამთავრობო სექტორსა და სახალხო დამცველს და ხშირად ხელისუფლების მესიჯბოქს იმეორებენ.
• ანგარიშის თანახმად, ამ გამოწვევასთან გამკლავების პოლიტიკური ნება არ არსებობს და ანტიდასავლური გზავნილების გამავრცელებელი ხშირად თავად ხელისუფლებაა.
• მაგალითად, მმართველი ძალისგან ფორმალურად გამიჯნული პოლიტიკოსები, რომლებიც ღიად პრორუსულ ნარატივს აჟღერებენ.

დეტალები: TI-ის განცხადებით, პრობლემად რჩება სახელმწიფოს მხრიდან გამოწვევის ზუსტი ანალიზი.

• ხშირ შემთხვევაში მათი ქმედებები ფორმალურია ან იმართება მმართველი პარტიის პოლიტიკური დღის წესრიგით.
• ანგარიშში ნათქვამია, რომ ხელისუფლება არ არის ეფექტიანი რუსული დეზინფორმაციის წინააღმდეგ, ხალხის დროული ინფორმირებისა და მავნე გავლენის შემსუბუქების კუთხით.
• "ხელისუფლების წარმომადგენლების ანტიდასავლური, მადისკრედიტირებელი და დეზინფორმაციული განცხადებები დასავლელი პარტნიორების, ელჩების, არასამთავრობო ორგანიზაციების, სტრატეგიული პარტნიორების წინააღმდეგ მოსახლეობაში თესავს სკეპტიციზმს დასავლეთის მიმართ, ყოფს საზოგადოებას და აძლიერებს რუსული დეზინფორმაციის გავლენებს ქვეყანაში", — წერს გამჭვირვალობა საქართველო.

ანგარიშში აღნიშნულია, რომ მმართველი პარტია მიზანმიმართულად ავრცელებს დეზინფორმაციას ოპონენტების, კრიტიკული მედიისა თუ არასამთავრობო სექტორის წარმომადგენლების წინააღმდეგ.

• ამას კი სოციალურ ქსელებში არაავთენტური ანგარიშებისა თუ ყალბი გვერდების გამოყენებით აკეთებს.
• ჩვენი მკითხველისთვის ცნობილია სახელისუფლებო პროპაგანდისა და ნარატივებით თავდასხმა დასავლელ და უკრაინელ პარტნიორებზეც.
• გარდა ამისა, ორგანიზაცია აღნიშნავს, რომ ხელისუფლება, როგორც წესი, არ თანამშრომლობს მათთან, ვინც დეზინფორმაციასთან ბრძოლის კუთხით მისი მთავარი მოკავშირეები უნდა იყვნენ.

რეკომენდაციები, რომლებსაც ორგანიზაცია სახელმწიფოს უზიარებს, ასეთია:

• ხელისუფლების წარმომადგენლებმა შეწყვიტონ ანტიდასავლური და მადისკრედიტებელი განცხადებები და არ გაავრცელონ დეზინფორმაცია.
• შეიქმნას საჯაროდ ხელმისაწვდომი დოკუმენტი, რომელიც განსაზღვრავს პროპაგანდასთან ბრძოლის ერთიან და დროში გაწერილ მიზნებს, პასუხისმგებელ უწყებებსა და შესაძლო აქტივობების ეფექტურობის შეფასების კრიტერიუმებს.
• შემუშავდეს ერთიანი მესიჯი დეზინფორმაციასთან საბრძოლველად.
• პროაქტიულად ხდებოდეს საზოგადოების ინფორმირება დეზინფორმაციულ ნარატივებთან დაკავშირებით, რათა მოქალაქეები მომზადებული შეხვდნენ მას და შემცირდეს დეზინფორმაციის გავლენა.
• უკრაინაში მიმდინარე ომის ფონზე, ხელისუფლებამ დეზინფორმაციულ გამოწვევებს მყისიერად და საერთაშორისო გამოცდილების გათვალისწინებით უპასუხოს.

კონტექსტი: უკრაინაში ომის დაწყებამდე ინფორმაციის სანდოობის ხელშეწყობის პროგრამის ფარგლებში ჩატარდა კვლევა, რომლის მიზანი იყო საზოგადოების დეზინფორმაციის მიმართ მოწყვლადობის შეფასება — შედეგების მიხედვით, მოსახლეობის უმრავლესობას მიაჩნია, რომ ხშირად აწყდება დეზინფორმაციას და არ შეუძლია მისი ამოცნობა.

• გამოკითხულთა 32% ამბობს, რომ არ გადაამოწმებდა სავარაუდოდ ყალბ ინფორმაციას, მხოლოდ 24 პროცენტია მათი რიცხვი, ვინც ალტერნატიულ წყაროს მოძებნიდა.
• კვლევამ აჩვენა ისიც, რომ მოსახლეობის მესამედი მოწყვლადია ანტიამერიკული დეზინფორმაციული გზავნილების მიმართ და უმრავლესობა მოწყვლადია ანტითურქული დეზინფორმაციული გზავნილების მიმართ.