უკრაინა-ევროკავშირის სამიტის დასკვნით დოკუმენტს ხელი ევროკომისიის პრეზიდენტმა, ურსულა ფონ დერ ლაიენმა, ევროპული საბჭოს პრეზიდენტმა, შარლ მიშელმა და უკრაინის პრეზიდენტმა, ვოლოდიმირ ზელენსკიმ მოაწერეს.

რატომ არის მნიშვნელოვანი: ევროკავშირის წევრი ქვეყნები შეთანხმდნენ, რომ აგრესიის შედეგად ჩადენილი დანაშაულებისთვის რუსეთის ხელმძღვანელობას პასუხისმგებლობა უნდა დაეკისროს და ამისთვის სამართლებრივი მექანიზმი უნდა არსებობდეს.

  • თუმცა ჯერჯერობით ჰააგის ტრიბუნალის შექმნაზე გადაწყვეტილება არ მიუღიათ.
  • წევრმა ქვეყნებმა მიუთითეს, რომ უკრაინის წინააღმდეგ რუსეთის აგრესიული ომის დროს ჩადენილი ომის დანაშაულების მზარდი მტკიცებულებები არსებობს და ეს საერთაშორისო სამართლის უხეში დარღვევაა.

დეტალები: ასევე, აღნიშნეს, რომ მხარს უჭერენ საერთაშორისო სისხლის სამართლის სასამართლოს პროკურორის გამოძიებას.

  • "რუსეთი, ყველა დამნაშავე და თანამზრახველი პასუხს აგებს", — ნათქვამია დოკუმენტში და აღნიშნულია, რომ შესაბამისი მექანიზმის ჩამოყალიბება საერთაშორისო საზოგადოების საერთო ინტერესს წარმოადგენს.
  • უკრაინამ კი სპეციალური ტრიბუნალის შექმნის აუცილებლობას გაუსვა ხაზი, თუმცა პასუხად ითქვა, რომ ამ დროისთვის ასეთი ტრიბუნალის შექმნაზე ევროკავშირში ერთსულოვნება არაა მიღწეული.