აშშ-ის ელჩი საქართველოში, იან კელი ტრისტან წითელაშვილის ბრალდებას პასუხობს და ამბობს, რომ იგი პანკისის ხეობაში მხოლოდ ერთხელ იყო, პრეზიდენტ გიორგი მარგველაშვილთან ერთად. ელჩი ასევე აცხადებს, რომ აშშ ებრძვის ექსტრემიზმის ნებისმიერ გამოვლინებას და მხარს უჭერს დაქართველოს რეფორმებს:

"მოხარული ვარ, რომ ამ უსაფუძვლო ბრალდებებს უნდა გავცე პასუხი. მიმაჩნია, რომ საქმიანობის გამჭვირვალობა და საჯაროობა არის უმნიშვნელოვანესი. ჩემი საქმიანობა არის გამჭვირვალე, საჯარო და გაშუქებული. მხარს ვუჭერ საქართველოს რეფორმების პროცესს, საქართველოს ევროატლანტიკურ მისწრაფებებსა და საქართველოს განვითარებას. ზოგადად, ჩემი მთავრობა ებრძვის ტერორიზმს".

გუშინ, 2 ივნისს, სააგენტო პატრიოტმა გაავრცელა ვიდეო, თუმცა ჩანაწერი ამჟამად მათ საიტზე აღარ იძებნება. ვიდეოჩანაწერის თანამად, თბილისის სახელმწიფო უნივერსიტეტში გაიმართა შეხვედრა ე.წ. "დასავლური საფრთხეები", რომელშიც თავდაცვის სამინისტროს ყოფილი თანამშრომელი, ტრისტან წითელაშვილი მონაწილეობდა.

თსუ-ში გამართული ანტიდასავლური დისკუსიის დროს, წითელაშვილმა იან კელი საქართველოს შიდა საქმეებში ჩარევაში დაადანაშაულა და თქვა, რომ "საქართველო არის აშშ-ის მძევალი" და რომ "იან კელი პანკისში სირიიდან დაბრუნებულ ტერორისტებს შეხვდა". წითელაშვილის თქმით, მას აქვს ინფორმაცია, რომ რუსეთის პრეზიდენტი ვლადიმერ პუტინი მზადაა, საქართველოსთან ისაუბროს აფხაზეთისა და ოსეთის საკითხზე.

უნივერსიტეტის პრორექტორის მიხეილ ჩხენკელის თქმით, მათ არ ჰქონდათ ინფორმაცია, თუ რა თემაზე იმართებოდა შეხვედრა. რუსთავი 2-თან საუბრისას მან განმარტა, რომ სივრცის დათმობისას, ყოფილმა თანამშრომელმა შეცვალა თემა:

"მან მოატყუა ფაკულტეტი და უნივერსიტეტი. თსუ ემიჯნება ყველა განცხადებას, რაც ამ ე.წ. სამეცნიერო შეხვედრაზე გაკეთდა. ჩვენი უნივერსიტეტი მუდამ იყო არის და იქნება ევროპული ღირებულებების ერთგული".

ტრისტან წითელაშვილს ამჟამად პოლიტპატიმრის სტატუსი აქვს. იგი 2008 წლის აგვისტოს ომის შემდეგ დააკავეს და სამშობლოს ღალატისთვის პატიმრობა მიუსაჯეს. 2013 წლის იანვარში, ხელისუფლებაში ქართული ოცნების მოსვლის შემდეგ მან ციხე დატოვა. წითელაშვილი გასულ წელს თავდაცვის სამინისტროს დაქვემდებარებაში არსებულ ობიექტებზე უნებართვოდ შესაძლო შესვლის საკითხზე, სკანდალში გაეხვა.