ნატოს საპარლამენტო ასამბლეის პრეზიდენტი, პაოლო ალი ამბობს, რომ დეკლარაცია დააფიქსირებს, რომ ნატო საქართველოს მტკიცედ უჭერენ მხარს. ამის შესახებ ალიმ დღეს განაცხადა, ინფორმაცია კი, საქართველოს პარლამენტმა გაავრცელა.

„ხვალ, პლენარულ სხდომაზე, მივიღებთ საბოლოო დეკლარაციას საქართველოს შესახებ. ეს არის საპარლამენტო ასამბლეის მხრიდან საქართველოს მიმართ განსაკუთრებული ყურადღების ნიშანი, რადგან, მსგავსი დეკლარაციის მიღება ჩვეულებრივი მოვლენა არ არის. ჩვეულებრივი მოვლენა არ არის, რომ ჩვენ სესიას ნატოს არაწევრ ქვეყანაში ვატარებთ, ასე რომ, ეს ჩვენს პრაქტიკაში გამონაკლისია,“ - თქვა ნატოს საპარლამენტო ასამბლეის პრეზიდენტმა, პაოლო ალიმ.

მისი თქმით, ნატოს საპარლამენტო ასამბლეა დაინტერესებულია, საქართველოს მიმართ ვალდებულების დემონსტრირება მოახდინოს. მანვე აღნიშნა, რომ ასამბლეა ჩრდილოატლანტიკურ ალიანსს საქართველოსთან ურთიერთობის კიდევ უფრო გაძლიერების რეკომენდაციას მისცემს.

„ძალიან ვართ დაინტერესებული, რომ საქართველოს მიმართ ჩვენი ვალდებულების დემონსტრირება მოვახდინოთ. დეკლარაცია ჯერ კიდევ განხილვის პროცესშია. ის მკაფიოდ დააფიქსირებს, რომ ნატო, ნატოს საპარლამენტო ასამბლეა მტკიცედ უჭერენ მხარს საქართველოს. ჩვენ ნატოს მივცემთ რეკომენდაციებს. ასევე, მივცემთ რეკომენდაციას, რომ კიდევ უფრო გააძლიეროს ურთიერთობა საქართველოსთან,“ - აღნიშნა პაოლო ალიმ.

26 მაისიდან 29 მაისის ჩათვლით, თბილისი ნატოს საპარლამენტო ასამბლეის საგაზაფხულო სესიას მასპინძლობს.