ალბათ უკვე ყველასათვის ცნობილია, რომ The Crown-ის მე-5 სეზონში პრინცესა დაიანას როლს ავსტრალიელი მსახიობი ელიზაბეთ დებიკი შეასრულებს. ელიზაბეთის თქმით, როცა ცნობილი გახდა, რომ სერიალის მე-5 და მე-6 სეზონებში ლედი დის ის განასახიერებდა, უამრავი შეტყობინება მიიღო ნაცნობ-მეგობრებისგან და თითქმის ყველა მათგანი ეკითხებოდა, მოუწევდა თუ არა უელსის პრინცესას ლეგენდარული "შურისძიების კაბის" ჩაცმა.

"გამაოცა ფაქტმა, თუ რამდენად მოჯადოებული იყო ხალხი ამ კაბით," — აცხადებს მსახიობი. — "როცა ცნობილი გახდა, რომ როლი მე მივიღე, შეტყობინებები მომდიოდა მილოცვებით, თუმცა მესიჯების უზარმაზარი ნაწილი "შურისძიების კაბას" ეხებოდა. 'მოგიწევს "შურისძიების კაბის" ჩაცმა?', 'ღმერთო ჩემო, შურისძიების კაბას ჩაიცვამ!'"

ლედი დიმ სხეულზე მჭიდროდ მომდგარი, მხრებზე მოხდილი შავი კაბა 1994 წელს მოირგო, როცა ლონდონში Serpentine Gallery-ში წვეულებას ესწრებოდა. იმავე ღამით პრინც ჩარლზმა საჯაროდ აღიარა, რომ პრინცესა დაიანას უღალატა და მათი ქორწინება ისე ჩამოიქცა, უკვე ვეღარაფერი ააშენებდა.

ფოტო: JAYNE FINCHER / GETTY IMAGES

ფოტო: NETFLIX

ელიზაბეთ დებიკის თქმით, "შურისძიების კაბის" ჩაცმა, რომლითაც ლედი დიმ სამეფო პროტოკოლი დაარღვია, ძალიან მნიშვნელოვანი და სიძლიერის მომგვრელი გამოცდილება იყო მისთვის.

"მან რაღაც გააღვიძა ჩემში, როგორც მსახიობში," — ამბობს დებიკი. — "ვერც კი ავხსნი. მართლა საოცარია, რომ ერთ კაბას შეუძლია, წარმოადგინოს ისტორიული მომენტი, ან თუნდაც ის ფაქტი რა საოცარია, რომ შეიძლება, ადამიანის ცხოვრებას ამხელა მნიშვნელობა მიენიჭოს და ასეთი ლეგენდარული გახდეს. ასე რომ, ეს დღე ნამდვილად დიდი დღე იყო ჩემთვის გადასაღებ მოედანზე."

The Crown-ის ფანებს შეეძლებათ ელიზაბეთ დებიკის ე.წ. "შურისძიების კაბაში" ხილვა, როცა სერიალის მე-5 სეზონი 9 ნოემბრიდან Neflix-ზე გამოვა. ელიზაბეთ დებიკისთან ერთად, ახალ სეზონს მსახიობები იმელდა სტონტონი (დედოფალი ელიზაბედი), დომინიკ ვესტი (პრინც ჩარლზი), ჯონათან პრაისი (პრინც ფილიპი) და ლესლი მენვილი (პრინცესა მარგარეტი) შეუერთდებიან.

მე-5 სეზონის პრემიერა დედოფალი ელიზაბეთის გარდაცვალებიდან 2 თვეში შედგება. პიტერ მორგანმა დაადასტურა, რომ შოუ მე-6 სეზონით დასრულდება.