17 მაისი ჰომოფობიასა და ტრანსფობიასთან ბრძოლის საერთაშორისო დღეა. 2004 წლიდან ის მსოფლიოს 120-ზე მეტ ქვეყანაში ყოველწლიურად აღინიშნება.

ეს არის დღე, როდესაც, 1990 წელს, მსოფლიო ჯანდაცვის ორგანიზაციამ (WHO) ჰომოსექსუალობა დაავადებათა საერთაშორისო კლასიფიკაციიდან ამოიღო.

თეთრი ხმაურის მოძრაობა 17 მაისს სოლიდარობას უცხადებს ლგბტქი თემს:

"ლგბტქი თემი მუდამ დგას ჩვენი ბრძოლის წინა ხაზზე. არ აქვს მნიშვნელობა, რამდენად განვსხვავდებით ერთმანეთისგან, ჩვენი სოლიდარობა ერთადერთი საწინდარია ამ უთანასწორო ბრძოლაში გარდაუვალი გამარჯვებისა".

მოძრაობის განცხადებით, ჰომოფობიასთან და საქართველოში არსებულ ნარკოპოლიტიკასთან ბრძოლას ბევრი საერთო აქვს:

"17 მაისთან ასოცირდება ბრძოლა, ძალადობა, დამცირება, დევნა, კრიმინალიზაცია, პათოლოგიზაცია, დაუსჯელობა, და უსამართლობის განცდა, სწორედ ისე, როგორც ჩვენს ბრძოლაშია.

ამ ბრძოლას ასევე უკავშირდება ბოროტებაზე გარდაუვალი გამარჯვების რწმენა, ისევე, როგორც ჩვენს ბრძოლაშია. როდესაც სისტემა ძალადობს შენზე, მისთვის მთავარია წაგართვას თავისუფლება, ისევე როგორც ჩვენთან. თუმცა, ამ შემთხვევაში გართმევენ ქუჩაში გამოსვლის უფლებას.

2001 წლამდე საქართველოში იგივე სქესის ადამიანებს შორის ზრდასრული და ურთიერთთანხმობაზე დამყარებული სქესობრივი კავშირი სისხლის სამართლის კოდექსით ისჯებოდა, ისევე, როგორც ნარკოტიკის მოხმარება დღეს. და ისევე, როგორც ნარკოტიკის მოხმარება ითვლება ავადმყოფობად, 1991 წლის 17 მაისამდე ჰომოსექსუალობაც ფსიქიკურ დაავადებად ითვლებოდა".

თეთრი ხმაურის მოძრაობა მართლმადიდებლური ეკლესიის მიერ 17 მაისის ოჯახის სიმტკიცის დღედ გამოცხადებას ეხმაურება:

"და თუ დღევანდელი დღე ოჯახის სიწმინდის დღეცაა, მაშინ ის ყველა ოჯახის, ყველა იმ ოჯახის სიწმინდის დღეა, რომელსაც სიყვარული უდევს საფუძვლად!"

მას შემდეგ, რაც 2013 წლის 17 მაისს თბილისში ჰომოფობიის წინააღმდეგ გამართული აქცია სასულიერო პირებმა და მათმა მხარდამჭერებმა დისკრიმინაციული მოტივებით დაარბიეს, საქართველოს მართლმადიდებელი ეკლესიის კათოლიკოს პატრიარქის ილია მეორის ინიციატივით, 2014 წელს, 17 მაისი ოჯახის სიმტკიცისა დღედ გამოცხადდა.