განცხადება გარემოსდაცვითი ზედამხედველობის დეპარტამენტმა გაავრცელა.

რატომ არის მნიშვნელოვანი: ინსპექტირებით დადგინდა, რომ ქუთაისში მოქმედ ქარხანა ამბიკონ სტილსი საქმიანობდა გარემოსდაცვითი გადაწყვეტილების პირობებისა და გადაწყვეტილებით დადგენილი ტექნოლოგიური ციკლის დარღვევით, რაც საფრთხეს უქმნის გარემოს.

  • ქარხანა 2019 წლის იანვრიდან ფუნქციონირებს.

დეტალები: უწყებაში აცხადებენ, რომ გადაწყვეტილება სასამართლოს დადგენილების საფუძველზე, დარღვევის გამოვლენის შემდეგ მიიღეს.

  • საწარმოს ეზღუდება მეტალურგიული წარმოება გარემოსდაცვითი გადაწყვეტილებით გათვალისწინებულ ტექნოლოგიურ ციკლთან საწარმოს საქმიანობის შესაბამისობაში მოყვანამდე;
  • ასევე სათანადოდ გამართული აირმტვერდამჭერი მოწყობილობების გამოყენების გარეშე.

უწყებაში განმარტავენ, რომ უფლებამოსილი პირები რეგულარულად გააკონტროლებენ საწარმოს მიერ მოთხოვნების შესრულების პროცესს.

  • თუ მოთხოვნები არ შეუსრულდა კანონმდებლობის თანახმად, შესაბამისი დაწესებულება 10 000 ლარიდან 30 000 ლარამდე ჯარიმდება;
  • ხოლო განმეორების შემთხვევაში — 20 000 ლარიდან 60 000 ლარამდე.

კომპანიაში გვითხრეს, რომ ამ დროისთვის დარღვევების აღმოფხვრამდე წარმოების პროცესი შეჩერებულია.

  • "კომპანიის მენეჯმენტი ცდილობს, მაქსიმალურად მოკლე ვადებში აღმოიფხვრას პრობლემები და შევძლოთ წარმოების პროცესის განახლება", — ამბობს ნათია სულაკაძე კორპორატიულ საქმეთა მენეკერი.