საპარლამენტო უმრავლესობაში მიაჩნიათ, რომ განსაკუთრებული შემთხვევის გარდა, მიწა უცხო ქვეყნის მოქალაქეებზე არ უნდა იყიდებოდეს. ამის შესახებ On.ge ქართული ოცნების დეპუტატს, მამუკა მდინარაძეს ესაუბრა. მისი თქმით, ქართული ოცნება მუშაობს ორგანულ კანონზე, აღნიშნულ საკითხს დაარეგულირებს.

მდინარაძე ამბობს, რომ დღევანდელი მდგომარეობით, მიწის გაყიდვა თავისუფლად შეიძლება და ის შიშობს, რომ ამან შესაძლოა "კატასტროფული შედეგი გამოიღოს". მისივე თქმით, ახალი რეგულაცია სწორედ ამის წინააღმდეგ იქნება მიმართული:

"თუ ექნება შესაძლებლობა ადამიანს, ან სახლემწიფოს, რომ უცხო ქვეყნის მოქალაქეზე ყოველგვარი აკრძალვისა და შეზღუდვის გარეშე გაყიდოს მიწა, შესაძლებელია, ერთ მშვენიერ დღეს, ძალიან დიდი ნაწილი ამ მიწისა აღმოჩნდეს არაქართული მოქალაქეების ხელში და ამან შეიძლება მძიმე შედეგამდე მიგვიყვანოს."

ქართველი კაცისთვის, მიწა არ არის მხოლოდ უძრავი ქონება

მამუკა მდინარაძე

მამუკა მდინარაძე, ასევე, განმარტავს, რომ ქართული ოცნება საკონსტიტუციო ჩანაწერსაც ცვლის იმის გამო, რომ საკონსტიტუციო სასამართლოს დაწესებული შეზღუდვის გაუქმების უფლება ჩამოერთვას:

"ორგანული კანონით, როგორი შეზღუდვაც არ უნდა დაადგინო უცხოელებზე მიწის გასხვისებაზე საკონსტიტუციო სასამართლო ვერასდროს იტყვის, რომ ეს არის არაკონსტიტუციური. ამით ხელ-ფეხი გვეხსნება, რომ ნებისმიერი შეზღუდვა უცხოელებზე მიწის გაყიდვსთან მიმართებით, იყოს კანონიერი და კონსტიტუციასთან შესაბამისი."

კონსტიტუციის პროექტის მე-19 მუხლი. საკუთრების უფლება - მეოთხე პუნქტი:

მიწაზე, როგორც განსაკუთრებული მნიშვნელობის რესურსზე, საკუთრების უფლებას აწესრიგებს ორგანული კანონი.

ორგანული კანონსა და მის პრინციპებზე მუშაობა ახლა მიმდინარეობს. რაც შეეხება საკონსტიტუციო ჩანაწერს, ის უკვე პროექტშია ასახული.

უცხო ქვეყნის მოქალაქეებზე მიწის გასხვისების წინააღმდეგ საკონსტიტუციო კომისიის სამუშაო პროცესის დროს გამოდიოდნენ ქართული ოცნების წევრები, ბექა ნაცვლიშვილი, კობა ნარჩემაშვილი და ახლა უკვე საკონსტიტუციო სასამართლოს მოსამართლე მანანა კობახიძე.