გიორგი მარგველაშვილმა სლოვაკეთის პრეზიდენტთან პირისპირ შეხვედრა გამართა. პრეზიდენტის პრესსამსახურის ინფორმაციით, მარგველაშვილის დახვედრის ოფიციალური ცერემონია სლოვაკეთის პრეზიდენტის სასახლეში გაიმართა.

პირისპირ შეხვედრაზე საქართველოს და სლოვაკეთის პრეზიდენტებმა ორ ქვეყანას შორის ურთიერთობების განვითარების და გაღრმავების საკითხებზე ისაუბრეს.

მხარეებმა მზადყოფნა გამოთქვეს, რომ ერთობლივი ძალისხმევით დააჩქარონ როგორც ორმხრივ, ასევე მრავალმხრივ ფორმატებში ქვეყნების პოლიტიკური და ეკონომიკური პოტენციალის მაქსიმალური გამოყენება ნაყოფიერი ურთიერთობებისა და ხელშესახები შედეგების მისაღწევად.

ამის შემდეგ, მხარეებმა შეხვედრა გაფართოებულ ფორმატში განაგრძეს.

სლოვაკეთის პრეზიდენტმა საქართველოს დელეგაციას გაფართოებული შეხვედრის დაწყებისას ის ფოტო აჩვენა, რომელიც მან საქართველოში ოფიციალური ვიზიტისას დაახლოებით ერთი წლის წინ, საოკუპაციო ხაზთან, ხურვალეთში გადაიღო.

გიორგი მარგველაშვილმა მადლობა გადაუხადა სლოვაკეთს საქართველოს ტერიტორიული მთლიანობისა და სუვერენიტეტის მხარდაჭერისათვის, ასევე, საქართველოს ევროპული და ევროატლანტიკური კურსის მხარდაჭერისათვის და ყურადღება გაამახვილა თავდაცვის სფეროში თანამშრომლობის კიდევ უფრო განვითარების მნიშვნელობაზე.

შეხვედრაზე პოლიტიკურ, ეკონომიკურ, თავდაცვისა და ტურიზმის სფეროში ურთიერთობების გაღრმავების საკითხებზე გაამახვილეს ყურადღება.

მხარეებმა ეკონომიკური და სავაჭრო ურთიერთობების განვითარების საკითხებზე საუბრისას ხაზი გაუსვეს ორ ქვეყანას შორის ეკონომიკური კავშირების გაფართოების აუცილებლობასა და ორმხრივი სავაჭრო ბრუნვის მოცულობის გაზრდას, რათა ორივე ქვეყანამ სრულად გამოიყენოს რეალური ეკონომიკური პოტენციალი.

ქართულმა მხარემ გამოხატა ინტერესი საქართველო- სლოვაკეთს შორის ტურიზმის განვითარების ხელშეწყობისათვის.

ხაზგასმით აღინიშნა ევროკავშირთან ურთიერთობის გაღრმავების მნიშვნელობა ენერგეტიკისა და სატრანსპორტო ინფრასტრუქტურის განვითარებისა და კავშირგაბმულობის მიმართულებით.

გიორგი მარგველაშვილმა მადლობა გადაუხადა სლოვაკეთის პრეზიდენტს სლოვაკეთის უნივერსიტეტებში სტუდენტებისათვის სტიპენდიების მინიჭებისა და სამომავლო თანამშრომლობის შესაძლებლობისათვის.

საქართველოს პრეზიდენტის განხადებით, საქართველო მიზნად ისახავს გახდეს ახალი სასწავლო ცენტრი აღმოსავლეთ ევროპის, ახლო აღმოსავლეთისა და დსთ-ს ქვეყნების ახალგაზრდებისათვის და ხელმისაწვდომ ფასად შესთავაზოს მათ დასავლური განათლების მიღების შესაძლებლობა.

გაფართოებულ შეხვედრაში მონაწილეობდნენ საქართველოს სახელმწიფო დელეგაციის წევრები სახელმწიფო მინისტრი ევროინტეგრაციის საკითხებში ვიქტორ დოლიძე, პრეზიდენტის ადმინისტრაციის უფროსი გიორგი აბაშიშვილი, ეროვნული უშიშროების საბჭოს მდივანი დავით რაქვიაშვილი, საგარეო საქმეთა მინისტრის მოადგილე დავით ჯალაღანია, პრეზიდენტის საგარეო ურთიერთობათა მდივანი თენგიზ ფხალაძე, პარლამენტარები - მამუკა ჩიქოვანი, რომან გოცირიძე, ადა მარშანია.